چین کے صوبہ آنہوئی کے شہر ووہو میں ایک خاتون نے آن لائن نجومی کی پیشگوئی پر بھروسہ کرکے اپنے شوہر پر بے وفائی کے سنگین الزامات لگا دیے۔
رپورٹ کے مطابق خاتون نے 500 یوآن (تقریباً 70 امریکی ڈالر) ایک آن لائن نجومی کو ادا کیے تاکہ وہ اس کے شوہر کی وفاداری کے بارے میں بتا سکے، نجومی نے دعویٰ کیا کہ خاتون کا شوہر دیگر خواتین کے ساتھ تعلقات رکھتا ہے اور انہیں پیسے دیتا ہے۔
خاتون نے نجومی کی پیشگوئی سن کر شوہر سے جھگڑا شروع کر دیا، جس کے بعد شوہر نے تنگ آکر پولیس سے رابطہ کیا اور پولیس کو تحقیقات سے معلوم ہوا کہ تمام الزامات محض نجومی کی کہانیوں پر مبنی تھے۔
پولیس افسر ژاؤ شنگیو کے مطابق خاتون نے نجومی کے دعوے پر اندھا اعتماد کیا، حالانکہ اس کے پاس کسی قسم کا ثبوت موجود نہیں تھا۔
رپورٹ کے مطابق پولیس کی مداخلت کے بعد دونوں میاں بیوی کے درمیان صلح ہو گئی اور خاتون نے اپنے رویّے پر معذرت کر لی۔
