بالی ووڈ کے کنگ، شاہ رخ خان، کو حال ہی میں اپنی آنے والی فلم “کنگ” کے پہلے منظر کے لیے تنقید کا سامنا کرنا پڑا، جس میں سوشل میڈیا صارفین نے ان کے انداز کو امریکی اداکار بریڈ پٹ کے ایف ون لک سے مماثل قرار دیا۔
فلم کے پہلے منظر کو شاہ رخ خان کی سالگرہ کے موقع پر جاری کیا گیا، جس میں وہ چمڑے کی بھوری جیکٹ، نیلی قمیص اور چمکدار دھوپ کے چشمے میں نظر آئے۔ چند صارفین نے کہا کہ لباس، بالوں کا رنگ اور اسٹائل بالکل بریڈ پٹ کے جیسا ہے، جبکہ دیگر نے اسے اتفاق یا فیشن کی مماثلت قرار دیا۔
ہدایتکار سدھارتھ آنند نے تنقید پر ردعمل دیتے ہوئے کہا کہ آج کل لوگ ہر چیز پر اعتراض کرنے کے عادی ہو گئے ہیں، اور ہر بڑے پروجیکٹ کے ساتھ ایسی بحث ہونا فطری بات ہے۔ انہوں نے مزید کہا کہ شاہ رخ خان کی محنت اور تخلیقی انداز کو سمجھنے کی ضرورت ہے، اور انہیں صرف کسی بین الاقوامی اداکار کے مشابہت کے لیے پرکھنا مناسب نہیں۔
شاہ رخ خان کے مداحوں نے بھی اداکار کے حق میں آواز بلند کی اور کہا کہ “کنگ” میں شاہ رخ خان کا نیا روپ جدید، پرکشش اور بین الاقوامی معیار کے مطابق ہے، جسے تنقید کے بجائے سراہا جانا چاہیے۔
کچھ صارفین نے یہ بھی کہا کہ دراصل یہ اسٹائل 2017 میں فلم “جب ہری میٹ سِجال” میں پہلے شاہ رخ خان نے اختیار کیا تھا، اور بریڈ پٹ کی فلم بعد میں آئی، لہٰذا یہ کہنا کہ شاہ رخ خان نے کاپی کی، درست نہیں۔
