دنیا کے بعض ممالک میں انسانی آبادکاری کی تاریخ ہزاروں سال پرانی ہے، اور ان میں سے ایک ملک ایسا بھی ہے جہاں لوگ تقریباً ایک لاکھ سال سے رہائش پذیر ہیں۔
ورلڈ پاپولیشن ریویو کے مطابق، یہ اعزاز ایران کو حاصل ہے۔ قدیم فارس سے آج کے ایران تک، انسان یہاں لگ بھگ 100,000 سال سے زندگی گزار رہے ہیں۔
ورلڈ پاپولیشن ریویو دنیا بھر میں موجودہ اور تاریخی آبادی کے رجحانات کا تجزیہ کرتا ہے۔ اس کے مطابق ایران، یا قدیم فارس، انسانی تاریخ میں سب سے پرانا آباد ملک مانا جاتا ہے، جہاں انسان مسلسل کسی نہ کسی شکل میں رہائش پذیر رہے ہیں۔
ایران کی قدیم تاریخ Elamite Empire سے جڑی ہوئی ہے، جو کانسی کے درمیانی دور میں ابھری اور 3200 سے 539 قبل مسیح تک قائم رہی۔ یہ تہذیب جدید ایران کے مغربی اور جنوب مغربی علاقوں میں موجود تھی، جس میں موجودہ خوزستان اور صوبہ ایلام کے ساتھ ساتھ جنوبی عراق کا ایک چھوٹا حصہ بھی شامل تھا۔
ورلڈ پاپولیشن ریویو کی فہرست میں بھارت کو دنیا کا دوسرا قدیم ترین ملک قرار دیا گیا ہے، جس کی تاریخ 2000 قبل مسیح تک جاتی ہے، جبکہ چین تیسرا قدیم ترین ملک مانا جاتا ہے، جس کی تاریخ بھارت کے قریب قریب ہے۔
