شہر قائد کے علاقے اورنگی ٹاون شاہ فیصل چوک گھر میں آگ لگنے سے 2 خواتین جھلس کر جاں بحق ہوگئیں۔
پولیس کے مطابق جاں بحق خواتین کی شناخت 50 سالہ کلیم النساء اور 25 سالہ عتیقہ کے نام سے کی گئی دونوں خواتین آپس میں ماں بیٹی ہیں۔
پولیس کا کہنا ہے کہ گھر میں آتشزدگی کا واقعہ ابتدائی طور پر شارٹ سرکٹ کے باعث پیش آیا، حادثے سے متعلق مزید معلومات اکٹھا کی جا رہی ہے۔
حکام کا کہنا ہے کہ جاں بحق ہونے والی خواتین کی لاشیں عباسی اسپتال منتقل کر دی گئی ہیں، فائر بریگیڈ کی ایک گاڑی نے آگ پر قابو پا لیا ہے۔
دوسری جانب کراچی کے علاقے گلستان جوہر میں ہولناک آگ نے 200 سے زائد جھگیاں جلاکر راکھ کردیں، واقعہ منور چورنگی کے قریب واقع جھونپڑیوں میں سلنڈر پھٹنے سے پیش آیا، آگ نے دیکھتے ہی دیکھتے 200 جھونپڑیوں کو لپیٹ میں لے لیا۔
فائر بریگیڈ کی 4 گاڑیوں نے کئی گھنٹوں کی جدوجہد کے بعد آگ پر قابو پایا، جھونپڑیوں میں موجود سامان متعدد موٹرسائیکلیں اور مویشی بھی جل گئے جبکہ کوئی جانی نقصان نہیں ہوا۔























