یوٹیلی اسٹورز کارپوریشن سے گھی ملوں کے واجب الادا 6.5ارب کی ادا ئیگی کی جائے، شیخ عمر ریحان
وزیر خزانہ سینیٹر اورنگزیب اور وزیر اعظم کے مشیرِ صنعت ہارون اختر خان فوری نوٹس لیں، چیئرمین پی وی ایم اے
کراچی ( ) پاکستان وناسپتی مینوفیکچررز ایسوسی ایشن (پی وی ایم اے) کے چیئرمین شیخ عمر ریحان نے حکومت سے مطالبہ کیا ہے کہ یوٹیلیٹی اسٹورز کارپوریشن پر گھی ملوں کے 6.5 ارب روپے کی رقم فوری طور پر واپس کی جائے، جو گزشتہ ایک سال سے واجب الادا ہے۔ انہوں نے کہا کہ اس معاملے پر بارہا توجہ دلانے کے باوجود تا حال رقم کی ادائیگی نہیں کی گئی، جس سے گھی و کوکنگ آئل انڈسٹری شدید مالی مشکلات سے دوچار ہے۔شیخ عمر ریحان نے کہا کہ ملک بھر کی گھی ملیں 6.5 ارب روپے روپے مالیت کا گھی اور کوکنگ آئل یوٹیلیٹی اسٹورز کو فراہم کر چکی ہیں، تاہم واجبات کی عدم ادائیگی کے باعث ان اداروں کو لیکویڈیٹی کے شدید مسائل کا سامنا ہے۔ انہوں نے کہا کہ صنعت کار اپنے آپریشنل اخراجات اور خام مال کی درآمد کے لیے سرمایہ کی قلت کا شکار ہیں، جس سے پیداواری عمل متاثر ہو رہا ہے اور اگر فوری اقدامات نہ کیے گئے تو صنعت کی پائیداری خطرے میں پڑ سکتی ہے۔ چیئرمین پی وی ایم اے نے واضح کیا کہ یہ مسئلہ صرف انڈسٹری کا نہیں بلکہ حکومتی ساکھ کا بھی ہے۔ انہوں نے کہا کہ ہم گزشتہ ایک سال سے وزارت خزانہ اور وزارت صنعت و تجارت کو اس اہم مسئلے سے آگاہ کر رہے ہیں، مگر کوئی عملی پیشرفت نہیں ہوئی۔ واجبات کی مسلسل عدم ادائیگی نے نہ صرف کاروباری برادری کا اعتماد متاثر کیا ہے بلکہ معیشت میں غیر یقینی صورتحال کو بھی جنم دیا ہے۔شیخ عمر ریحان نے وزیر خزانہ سینیٹر محمد اورنگزیب اور وزیر اعظم کے مشیر برائے صنعت و تجارت ہارون اختر خان سے اپیل کی کہ وہ ذاتی دلچسپی لیتے ہوئے اس معاملے کی فوری تحقیقات اور رقم کی واپسی کے لیے مؤثر اقدامات کریں۔شیخ عمر ریحان نے کہا کہ گھی و کوکنگ آئل انڈسٹری ملک کی فوڈ سیکیورٹی اور روزگار کے تسلسل میں اہم کردار ادا کر رہی ہے، اس لیے حکومت پر لازم ہے کہ وہ صنعتکاروں کے واجبات کی بروقت ادائیگی یقینی بنائے تاکہ یہ شعبہ استحکام کے ساتھ ملکی معیشت میں اپنا کردار ادا کرتا رہے۔
