منشا پاشا اور آغا علی پہلی بار میاں بیوی کے روپ میں

جلد ہی منشا پاشا اور آغا علی پہلی بار میاں اور بیوی کے روپ میں شائقین کو محظوظ کرنے کے لیے ایکشن میں دکھائی دیں گے۔
یہ کہنا قبل از وقت ہے کہ دونوں کی جوڑی اسکرین پر کیسی لگی گی تاہم دونوں کے مداحوں کو امید ہے کہ دونوں کی جوڑی انتہائی اچھی دکھنے کے علاوہ کامیاب بھی جائے گی۔
منشا پاشا اور آغا علی جلد ہی ایک ایسی ٹیلی فلم سیریز میں جوڑے کے کردار میں دکھائی دیں گے جو مشکل حالات کی وجہ سے کچھ غیر اہم فیصلے کرتے ہیں جس وجہ سے ان کی زندگی ماضی جیسی نہیں رہتی۔
منشا پاشا نے ڈان امیجز سے بات کرتے ہوئے آنے والی ٹیلی فلم اور اپنے کردار کے حوالے سے بتایا کہ وہ فلم سیریز میں ماہرہ نامی کردار ادا کریں گی اور ان کا کردار انتہائی اہم ہے۔
انہوں نے بتایا کہ وہ اور آغا علی ایک ایسے نوجوان جوڑے کے کردار میں دکھائی دیں گے جن پر مشکل وقت آتا ہے تو جس کے بعد ان کی زندگی میں بہت بڑا بدلاؤ آتا ہے۔
منشا پاشا نے بتایا کہ حالات کی وجہ سے انہیں نوکری کرنی پڑتی ہے جس کے بعد ان کے مسائل بڑھ جاتے ہیں کیوں کہ وہ نوکری کرنے کے دوران اپنے شوہر کے تحفظات اور خدشات کو دور کرنے کے لیے انتہائی محتاط ہوجاتی ہیں۔

منشا پاشا کے مطابق ان کا کردار ایسا ہے کہ وہ نوکری کے دوران شوہر کے تحفظات دور کرنے کے دوران مسائل کا شکار بن جاتی ہے جس وجہ سے ان سے کچھ انجانے میں غلط حرکتیں بھی ہوجاتی ہیں۔
منشا پاشا نے بتایا کہ ڈرامے میں ان کا کردار انتہائی اہم ہے اور ان کا کردار خواتین کو یہ پیغام دیگا کہ کس طرح خواتین کو مسائل میں اور عدم تحفظ کی صورتحال میں آگے بڑھنا چاہیے۔
منشا پاشا کی طرح آغا علی نے بھی ٹیلی فلم میں کام کرنے کے حوالے سے اپنے جذبات کا اظہار کیا اور انہوں نے ڈرامے کے سین سے اداکارہ کے ساتھ اپنی تصویر شیئر کی۔
آغا علی نے لکھا کہ انہیں منشا پاشا کے ساتھ پہلی بار کام کرکے بہت اچھا لگا۔
آغا علی نے ڈرامے کے سین سے اداکارہ کی ساتھ شادی کے منظر کی تصویر شیئر کرتے ہوئے ان کے لیے نیک خواہشات کا بھی اظہار کیا اور لکھا کہ وہ ہمیشہ خوش رہیں اور ایسے ہی خوش رہیں جیسے وہ تصویر میں دکھائی دے رہی ہیں۔
ہدایت کار محمد اشر اصغر کی ٹیلی فلم سیریز کو حبیب جان نے پروڈیوس کیا ہے اور اسے جلد ہی نجی ٹی وی اے پلس پر نشر کیا جائے گا۔

اپنا تبصرہ بھیجیں