فیڈرل بورڈ اور آئی بی سی سی کے اشتراک سے امتحانی بورڈز میں امتحانی عمل کی ڈیجیٹلائزیشن پر قومی ورکشاپ کا انعقاد

اسلام آباد:فیڈرل بورڈ اور آئی بی سی سی کے اشتراک سے امتحانی بورڈز میں امتحانی عمل کی ڈیجیٹلائزیشن پر دو روزہ قومی ورکشاپ فیڈرل بورڈ آڈیٹوریم میں منعقد ہوئی ۔ وفاقی سیکرٹری تعلیم ندیم محبوب نے دو روزہ ورکشاپ کا افتتاح کیا۔ ورکشاپ میں ملک بھر کے امتحانی بورڈز کے چیئرمین ،کنٹرولرزاور آئی ٹی کے افسران نے بھی شرکت کی۔

چیئرمین فیڈرل بورڈ ڈاکٹر اکرام علی ملک اور ایگزیکٹو ڈائریکٹر آئی بی سی سی ڈاکٹر غلام علی ملاح نے وفاقی وزیرِ مملکت برائے تعلیم و پیشہ وارانہ تربیت وجیہہ قمر ، وفاقی سیکرٹری ندیم محبوب اور شرکاء کا پرجوش خیر مقدم کیا ۔ اس موقع پر ڈاکٹر غلام علی ملاح نے اپنے خطاب میں کہا کہ امتحانی نظام کی ڈیجیٹل تبدیلی مشترکہ مشن ہے، ٹیکنالوجی سے شفافیت اور کارکردگی میں بہتری آئے گی ۔

چیئرمین فیڈرل بورڈ ڈاکٹر اکرام علی ملک نے امتحانی نظام میں ڈیجیٹل اصلاحات اور ٹیکنالوجی کے استعمال اور اس کے دیگر بورڈز کو ٹرانسفر کا تفصیلی جائزہ پیش کیا۔ چیئرمین فیڈرل بورڈ اور ایگزیکٹو ڈائریکٹر آئی بی سی سی نے مہمانانِ خصوصی کو یادگاری شیلڈز پیش کیں۔

وفاقی سیکرٹری ندیم محبوب نے اپنے خطاب میں شرکا ء کی حوصلہ افزائی کرتے ہوئے اس بات کا اعادہ کیا کہ ڈیجٹلائزیشن کے اس سفر میں وزارت تعلیم تمام امتحانی بورڈز کو مکمل تعاون فراہم کرے گی۔

وفاقی وزیرِ مملکت وجیہہ قمر نے دو روزہ ورکشاپ کے اختتامی روز شرکاء سے خطاب کرتے ہوئے فیڈرل بورڈ کی ڈیجیٹل اصلاحات اور قیادت کو سراہا۔

انہوں نے کہا کہ فیڈرل بورڈ نے چند سال قبل امتحانی مراکز کو ڈیجیٹلائز کر کے ایک مثالی قدم اٹھایا جس کے تحت بائیومیٹرک سسٹم اور رئیل ٹائم ڈیش بورڈ کے ذریعے طلباء، اساتذہ اور امتحانی مراکز کی مؤثر نگرانی ممکن ہوئی۔

وجیہہ قمر نے یاد دلایا کہ میڈم فاطمہ طاہرہ، (موجودہ سیکرٹری فیڈرل بورڈ و کنٹرولر امتحانات) نے اس نظام کی نگرانی میں کلیدی کردار ادا کیا۔ انہوں نے مزید کہا کہ چیئرمین فیڈرل بورڈ ڈاکٹر اکرام علی ملک کی ویژنری قیادت نے جدید ٹیکنالوجی کے مؤثر استعمال سے امتحانی نظام میں شفافیت، تیزرفتاری اور کارکردگی میں نمایاں بہتری پیدا کی ہے۔ فیڈرل بورڈ کی یہ کامیاب ڈیجیٹل اصلاحات دیگر تعلیمی بورڈز کے لیے ایک بہترین رول ماڈل ہیں۔

وزیرِ مملکت نے اس بات پر زور دیا کہ ڈیجیٹل ٹیکنالوجی اور مصنوعی ذہانت (اے آئی) کو تعلیمی نظام کا لازمی جزو بنایا جائے کیونکہ یہ نظامِ تعلیم میں بہتری، میرٹ اور شفافیت کے فروغ کا ذریعہ ہے۔

انہوں نے تمام شرکاء کے لئے نیک تمناؤں کا اظہار کرتے ہوئے کہا کہ وزارتِ تعلیم اس ڈیجیٹل ریفارم کے سفر میں تمام امتحانی بورڈز کے ساتھ بھرپور تعاون جاری رکھے گی۔

اس سلسلے میں پاکستان بھر سے، بشمول آزاد جموں و کشمیر، گلگت بلتستان، تمام صوبوں اور اسلام آباد کے آئی ٹی ایکسپرٹس، ٹیکنالوجی فیلوز اور ٹیسٹنگ و ایویلیوایشن سے وابستہ ماہرین کے لئے وزارت تعلیم و پیشہ وارانہ تربیت ، آئی بی سی سی اور فیڈرل بورڈ کی جانب سے ایک ہفتے پر مشتمل خصوصی تربیتی پروگرام کا اہتمام کیا جائے گا۔

اس پروگرام کا مقصد امتحانی نظام میں ڈیجیٹل مہارتوں کو فروغ دینا، جدید ٹیکنالوجی کے استعمال کو مؤثر بنانا، اور تمام امتحانی بورڈز کے درمیان ہم آہنگی کو مضبوط کرنا ہے۔

اس موقع پر چیئرمین فیڈرل بورڈ ڈاکٹر اکرام علی ملک، سیکرٹری آئی بی سی سی ڈاکٹر غلام علی ملاح، سیکرٹری فیڈرل بورڈ میڈم فاطمہ طاہرہ، ڈائریکٹر ٹیسٹ ڈویلپمنٹ مرزا علی، ڈائریکٹر آئی ٹی مینجمنٹ ڈاکٹر بشیر خان اور ڈائریکٹر ٹیسٹ ایویلیوایشن عقیل عمران نے پاکستان بھر سے آئے ہوئے امتحانی بورڈز کے چیئرمینز اور آئی ٹی ماہرین کو فیڈرل بورڈ کے جدید امتحانی نظام پر تفصیلی بریفنگ دی۔

اختتام پر ڈاکٹر اکرام علی ملک نے ملک بھر سے آئے تمام تعلیمی بورڈز کے چیئرمینز اور نمائندگان کو فیڈرل بورڈ میں جاری جدید امتحانی کاپیوں کی پرنٹنگ، سکیننگ کے عمل اور ون ونڈو سیل کا تفصیلی دورہ کرایا۔