بین الاقوامی روڈ اسسمنٹ پروگرام کی طرز پر کراچی کی سڑکوں کو جانچنا چاہیۓ، اجمل کھوسو
حادثات سے بچاؤ کے لیے خود اپنی حفاظت کرنا ہر فرد کی اوّلین ذمے داری ہے،ڈاکٹر میر شبر علی
جامعہ این ای ڈی کے شعبہ اربن و انفرااسٹکچر انجینئرنگ اور ٹیوٹا روڈ امپرومنٹ پروجیکٹ کے تحت سیمینار کا انعقاد
کراچی() جامعہ این ای ڈی کے شعبہ اربن و انفرااسٹکچر انجینئرنگ اور ٹیوٹا روڈ امپرومنٹ پروجیکٹ کے تحت سیمینار منعقد کیا گیا، جس کا مقصد انسانی زندگی کو لاحق خطرات کے تدارک سے طالب علموں کو آگاہ کرنا تھا۔ جامعہ کی ترجمان فروا حسن کے مطابق مقررین نے حکومتی، افرادی و انفرادی کاوشوں کو بھی مسئلے کے حل کے لیے اہم قرار دیا۔ اس سیمینار میں ڈین فیکلٹی سول اینڈ پٹرولیم انجینئرنگ (سی پی ایل) ڈاکٹر اسد الرحمان خان نے استقبالیہ میں مہمانوں کو خوش آمدید کیا جب کہ نظامت کے فرائض لیکچرار شاہ رخ خان نے انجام دیئے۔ سیمینار سے خطاب کرتے ہوۓ کی نوٹ اسپیکر/ ڈین فیکلٹی سول و آرکٹیکچر انجینئرنگ سرسید یونی ورسٹی ڈاکٹر میر شبر علی کا کہنا تھا کہ دیکھا جائے تو ترقی یافتہ ممالک میں عوام کی جان و مال کی حفاظت کے لیے ریاست اہم کردار ادا کرتی ہے، قانون کی پاسداری کروانا اور ایسے اُصول و ضوابط تشکیل کرنا جس سے شہریوں کی زندگی متاثر نہ ہو حکومتی ذمے داری ہے لیکن خود اپنی حفاظت کرنا بھی ہر فرد کی اوّلین ذمے داری ہے۔ ان کا مزید کہنا تھاکہ ٹریفک حادثات کو روکنے یا انہیں کم کرنے کا آسان ترین حل اسی میں ہے کہ پاکستان کو بہترین حکمت عملی کے تحت ٹریفک حادثات کے حل کے لیے سوچنا ہوگا۔ طالب علموں سے خطاب کرتے ہوۓ کی نوٹ اسپیکر/ اجمل خان کھوسو سیکٹر کمانڈر سیکٹر ون اُوتھل نیشنل ہائی ویز اینڈ موٹروے پولیس نے کہا کہ آپ سول انجیئنر ہیں اور سول انجئینرنگ معجزے کا دوسرا نام ہے، روایتی طرزِ فکر کو خیرباد کہہ کر آپ سول و اربن انجیئنرز کو معجزہ دکھانا ہوگا۔ ان کا کہنا تھاکہ اربن پلاننگ کے تناظر میں معاملات کو جدید طرز پر دیکھنا ہوگا۔ انہوں نے مشورہ دیا کہ روڈ اسسمنٹ پروگرام نیشنل ہائی ویز کی طرز پر کراچی کی سڑکوں کو جانچنا چاہیۓ۔ اس موقعے پر خطاب کرتے ہوۓ چیئرمین شعبہ اربن و انفرااسٹکچر انجینئرنگ ڈاکٹر عدنان قادر کا کہنا تھاکہ ایسے اصول و ضوابط بھی تشکیل دینے کی ضرورت ہے جہاں ایک جانب شہریوں میں آگہی ہو اور دوسری جانب ان کے غیر ذمہ دارانہ رویوں کو تبدیل کیا جاسکے۔ اس موقعے پر انڈس موٹر کی ڈپٹی مینیجر کارپوریٹ کمیونیکیشن اینڈ کسٹمر ریلشنز تحریم ماجد نے بھی پریزینٹیشن دی جب کہ آرگنائزر/ ایسوسی ایٹ پروفیسر ڈاکٹر اشعر احمد کا کہنا تھا کہ اگر اصول و ضوابط نہیں ہوں گے اور انتشار ہوگا تب یہ انتہائی مشکل ہے کہ ہم ٹریفک حادثات سے وابستہ مسائل کو بہتر طور پر حل کرسکیں۔ سیمینار میں ایس ایس پی ٹریفک (ایسٹ) امجد حیات سمیت این ای ڈی کے عملے نے بھی شرکت کی جب کہ اس موقعے پر طالب علموں اور اسٹاف میں ہیلمٹ بھی تقسیم کیے۔
