وفاقی وزیر چوہدری سالک حسین سے قطر میں مقیم پاکستانی کمیونٹی کے 40 رکنی وفد نے ملاقات کی۔ وفد میں مختلف شعبوں سے تعلق رکھنے والے انٹرپرینیورز، پروفیشنلز، اسکلڈ اور سیمی اسکلڈ ورکرز شامل تھے۔ اس موقع پر ڈپٹی ہیڈ آف مشن دوحہ سید مصطفیٰ ربانی اور سیکرٹری ورکرز ویلفیئر فنڈ ذوالفقار احمد بھی موجود تھے۔
چوہدری سالک حسین نے کہا کہ سمندر پار پاکستانی ملک کی معیشت کا مضبوط ستون ہیں اور ان کی فلاح و بہبود حکومت کی اولین ترجیح ہے۔ انہوں نے بتایا کہ وزیراعظم محمد شہباز شریف کی ہدایت پر اسلام آباد میں منعقدہ اوورسیز کانفرنس کی بیشتر تجاویز پر عملدرآمد مکمل ہو چکا ہے، جبکہ باقی نکات پر تیزی سے پیش رفت جاری ہے۔ وفاقی وزیر نے سفارتی عملے کو ہدایت کی کہ حکومت کے اوورسیز پاکستانیوں کے لیے شروع کردہ منصوبوں سے متعلق آگاہی مہم چلائی جائے تاکہ زیادہ سے زیادہ پاکستانی ان سہولتوں سے فائدہ اٹھا سکیں۔ انہوں نے یہ بھی کہا کہ اگر کسی اوورسیز پاکستانی کا انتقال ہو جائے تو ان کے اہل خانہ کو انشورنس کلیم کے حوالے سے مکمل رہنمائی فراہم کی جائے۔
قطر میں مقیم پاکستانی کمیونٹی نے وزیراعظم محمد شہباز شریف، چیف آف آرمی اسٹاف فیلڈ مارشل سید عاصم منیر اور وفاقی وزیر چوہدری سالک حسین کو اوورسیز پاکستانیوں کے لیے کیے گئے اقدامات پر خراجِ تحسین پیش کیا۔ وفد نے اوورسیز پاکستانی فاؤنڈیشن (OPF) میں اصلاحات اور ایمیگرنٹس کے لیے مثبت اقدامات کو بھی سراہا
