October 13, 2025
واشنگٹن:وفاقی وزیرِ خزانہ سینیٹر محمد اورنگزیب سالانہ آئی ایم ایف اور ورلڈ بینک اجلاسوں میں شرکت کے لیے واشنگٹن ڈی سی پہنچ گئے۔وزیرِ خزانہ کی واشنگٹن میں سرکاری ملاقاتوں کا آغاز آئی ایف سی کے ریجنل وائس پریذیڈنٹ ریکارڈو پُلِتی سے ملاقات سے ہوا۔ملاقات میں پاکستان کے مضبوط معاشی اشاریوں پر بات چیت ہوئی۔
وزیرِ خزانہ نے پاکستان میں نجی شعبے میں سرمایہ کاری کے فروغ میں آئی ایف سی کے کردار کو سراہا۔آئی ایف سی کے 10 سالہ کنٹری پارٹنرشپ فریم ورک کے تحت اربوں ڈالر کی سرمایہ کاری پر اطمینان کا اظہار کیا۔اس کے ساتھ ساتھ پاکستان اور آئی ایف سی کا ریکو ڈک منصوبے کی جلد مالی تکمیل پر اتفاق کیاگیا۔
وزیرِ خزانہ نے اسلام آباد میں آئی ایف سی کے ریجنل دفتر کے قیام کا خیرمقدم کیا۔محمد اورنگزیب نے اسلامی ترقیاتی بینک کے صدر ڈاکٹر محمد سلیمان الجاسر سے ملاقات کی ۔
وزیرِ خزانہ نے پاکستان کے لیے اسلامی ترقیاتی بینک کی طویل مدتی معاونت پر شکریہ ادا کیا۔ملاقات میں جاری منصوبوں کی پیش رفت اور بروقت تکمیل پر زور دیا گیا۔آئی ایس ڈی بی بورڈ کی جانب سے ایم-6 موٹروے کے دو حصوں کی فنانسنگ کی منظوری پر وزیرِ خزانہ نے شکریہ اداکیا۔
دونوں فریقوں نے پولیو کے خاتمے اور تیل فراہمی منصوبوں میں مزید تعاون سمیت پاکستان کے لیے نئے کنٹری انگیجمنٹ فریم ورک (CEF) کی تیاری پر اتفاق کیا۔
