بھارتی ٹیسٹ ٹیم کے کپتان شبمن گل نے ویسٹ انڈیز کے خلاف شاندار کارکردگی دکھاتے ہوئے کئی ریکارڈز اپنے نام کر لیے۔ نئی دہلی میں جاری سیریز کے دوسرے ٹیسٹ میں گل نے ناقابلِ شکست 129 رنز بنائے اور اپنی ٹیم کو 5 وکٹوں کے نقصان پر 518 رنز کے مجموعے تک پہنچا کر اننگز ڈیکلیئر کردی۔
یہ شبمن گل کے ٹیسٹ کیریئر کی 10ویں سنچری تھی، جبکہ بطور کپتان یہ ان کی پانچویں سنچری ہے، جس کے ساتھ انہوں نے سچن ٹنڈولکر کو پیچھے چھوڑتے ہوئے اور ویرات کوہلی کا ریکارڈ توڑتے ہوئے ایک نیا سنگ میل عبور کیا۔
بطور کپتان شبمن گل نے صرف 12 اننگز میں پانچ سنچریاں مکمل کیں، جس کے باعث وہ ٹیسٹ کرکٹ کی تاریخ میں تیز ترین پانچ سنچریاں بنانے والے تیسرے کپتان بن گئے۔ ان سے قبل یہ اعزاز الیسٹر کک (9 اننگز) اور سنیل گواسکر (10 اننگز) کے پاس تھا۔
یہ بھارت کی ٹیسٹ کرکٹ میں تیسری بار ہے کہ کسی کپتان نے ایک ہی سال میں پانچ سنچریاں بنائیں۔ اس سے قبل ویرات کوہلی نے 2017 اور 2018 میں یہ کارنامہ انجام دیا تھا، مگر انہوں نے یہ ریکارڈ 18 اننگز میں مکمل کیا تھا، جب کہ شبمن گل نے صرف 12 اننگز میں یہ کارکردگی دکھا کر انہیں پیچھے چھوڑ دیا۔
واضح رہے کہ شبمن گل کی ویسٹ انڈیز کے خلاف یہ اننگز ان کے ہوم گراؤنڈ پر سب سے بڑی اننگز ہے۔ اس سے پہلے انہوں نے 2023ء میں آسٹریلیا کے خلاف احمد آباد ٹیسٹ میں 128 رنز بنائے تھے۔
