سینئر صحافی،تجزیہ نگار، محقق اور براڈ کاسٹر..کراچی سمیت صوبہ سندھ کی صحافت میں بڑا معتبر اور پیارا نام نہایت ہی نفیس انسان عاجزی و انکساری آپ کا شیوا ہے چھوٹے بڑوں ہر کسی کے ساتھ عزت و احترام سے پیش آتے ہیں میری آپ سے 2007 میں ٹیلی فونک ملاقات ہوئی میں اس وقت نوائے وقت ملتان میں تھا اور الطاف مجاہد صاحب نوائے وقت کراچی کے ڈسٹرکٹ نیوز ایڈیٹر تھے کراچی کے نوائے وقت ایڈیشن میں ایک خبر لگوانی تھی میں نے الطاف صاحب کو فون کیا اور درخواست کی اگلے دن ڈیوٹی پر آئے اور کراچی ایڈیشن پڑھا تو وہ خبر پروٹول کے ساتھ لگی ہوئی تھی فورا شکریہ ادا کرنے کے لیے الطاف صاحب کو فون کیا بڑے لوگوں کی بڑی باتیں ہوتی ہے اور ایک اچھی بات یا ادا انسان کو بلندیوں تک پہنچا دیتی ہے الطاف صاحب نے مھجے فون پر کہا کہ ہم کسی کو کیا دے سکتے ہیں ایک اچھی خبر اور ایک اچھی تصویر یہ ایسے الفاظ تھے جو مھجے آج تک نہیں بھولے 2013میں کراچی جانے کا اتفاق ہوا نوائے وقت کراچی آفس میں الطاف مجاہد صاحب سے مختصر لیکن سیر حاصل نشت ہوئی جو تمام عمر بھلا نہیں سکتا اس لیے علاوہ سپورٹس ایڈیٹر قمر خان صاحب اور اس وقت کے ریزیڈنٹ ایڈیٹر سعید خاور صاحب سے بھی ملاقات ہوئی جنم دن پر الطاف مجاہد صاحب کو بہت بہت مبارک ہو اللہ تعالٰی صحت و تندرستی والی زندگی عطا فرمائے آمین..
الطاف صاحب کی صحافت کی بائیو گرافی یوں ہے
انتہائی کم عمری میں شعبہ صحافت سے وابستگی کا اعزاز حاصل کرنے والے الطاف مجاہد کا نام والدین نے الطاف احمد خان رکھا تھا ۔ شعر و سخن کے ناطے شاہد کا تخلص اختیار کیا تو استاد محترم مفتی عبدالرحیم سکندری علیہ رحمتہ نے اسے مجاہد میں تبدیل کر دیا۔
آپ کی ولادت سندھ کے ایک دور افتادہ قصبے شاہ پور چاکر ضلع سانگھڑ میں ہوئی ، والدین جو پٹھانوں کے ناغڑ قبیلہ سے تعلق رکھتے ہیں، جو دہلی کے نواحی قصبہ گوڑیانی ضلع روہتک سے ہجرت کر کے وہاں آباد ہوئے تھے ۔
ملک کی قدیم ترین نیوز ایجنسی پی پی آئی کراچی کی جانب شاہ پور چاکر کے قصبہ میں نامہ نگار رہے اور آج اسی ادارے میں بحیثیت انچارج اُردو سروس فرائض کی انجام دہی میں مصروف ہیں ۔ شاہ پور چاکر میں ہفت روزہ افق (بانی اور ایڈیٹر ظہور الحسن بھوپالی شہید)‘ ہفت روزہ الشمس ملتان‘ ندائے افغان ملتان اور روزنامہ جسارت کراچی سے بحیثیت نمائندہ وابستہ رہے ۔
آپ 1979ء میں شعبہ صحافت میں بہتر مواقعوں کی تلاش میں کراچی شہر منتقل ہوگئے اور کچھ عرصہ بعد ہفت روزہ افق میں معاون مدیر کے عہدہ پر ملازم ہوگئے۔ کراچی شہر کے شام کے ایک قدیم روزنامہ، روزنامہ آغاز کراچی میں انچارج مانیٹرنگ ڈیسک، روزنامہ معراج میں سٹی ایڈیٹر‘ روزنامہ جنگ کراچی کے میگزین سیکشن میں مہران رنگ اور نوجوانوں کے صفحات کی نگرانی کی اور بعد ازاں سٹی ایڈیٹر بھی رہے ۔
اس دوران روزنامہ قومی اخبار کراچی میں شہر قائد اور حیدر آباد کے صفحات کو مرتب کرنے کی ذمہ داری انجام دیں ۔ جبکہ روزنامہ آواز انٹرنیشنل لندن میں ایڈیٹر پاکستان ڈیسک اور ایڈیٹر کشمیر ڈیسک کی حیثیت سے بھی فرائض انجام دیئے ۔
پھر ادارہ نوائے وقت میں شمولیت اختیار کی اور روزنامہ نوائے وقت کراچی میں 26 برس کے طویل عرصہ تک ایڈیٹر سندھ بلوچستان ڈیسک رہے اور اسی ادارے کے ہفت روزہ فیملی میگزین لاہور کے لئے نمائندہ خصوصی برائے سندھ مقرر ہوئے اور ہفت روزہ فیملی میگزین، ہفت روزہ ندائے ملت میں ایک عرصہ تک مستقل سندھ کی سیاسی ڈائری ، فیچر،رائٹ اپ قلمبند کئے ۔ بعد ازاں ہفت روزہ مہارت لاہور کے بیورو چیف سندھ کی ذمہ داریاں بھی بخوبی نبھائیں ۔
1999ءمیں پاکستان ٹیلی ویژن کراچی اسٹیشن اور 2013ء میں ریڈیو پاکستان کراچی سے بطور کنٹری بیوٹر وابستہ ہوئے اور آج کل بھی ریڈیو پاکستان کے معروف پروگرام” ڈیٹ لائن کراچی” اور” آج کی بات ” میں ہر ہفتے مختلف موضوعات اور حالات حاضرہ پر اظہار خیال کرتے ہیں۔ علاوہ ازیں آپ جیوے پاکستان نامی نیوز ویب سائٹ سے بحیثیت وقائع نگار خصوصی وابستہ ہیں ۔ اسی طرح نجی ٹی وی چینلز میٹرو نیوز‘ سندھ ٹی وی،دھرتی ٹی وی، سچ ٹی وی، حق ٹی وی، آواز ٹی وی، اے آر وائی نیوز‘ سٹی چینل اور عوامی آواز ویب چینل سمیت متعدد قومی اور علاقائی نیوز چینلز پر حالات حاضرہ پر گفتگو میں شرکت کر چکے ہیں ۔
آپ نے فائن ٹی وی نیٹ ورک کے پروگرام ”بات سے بات“ کی کئی برس تک میزبانی کی۔ ایف ایم 105 ریڈیونیٹ ورک کے مقبول پروگرام “پریس کلب” اور پولیس ایف ایم 8.6 ایف ایم پر” یادیں آپ کی باتیں ہماری ” سمیت کئی پروگراموں کی میزبانی کی ۔ ریڈیو پاکستان کے ماہانہ جریدے ماہنامہ آہنگ،حکومت سندھ کے ترجمان ماہنامہ” اظہار ” ہفت روزہ سندھ منظر اور وفاقی حکومت کے ماہنامہ پاک جمہوریت میں مدتوں مختلف موضوعات پر مضامین تحریر کئے
1988میں “نور سحر”کے نام سے ایک ماہنامہ کا ڈیکلریشن بھی حاصل کیا اور اس ماہنامہ کو بڑی جدوجہد کے ساتھ کئی برس تک جاری رکھا
ان دنوں روزنامہ جنگ کراچی، روزنامہ جراءت کراچی‘ جیوے پاکستان نیوز ویب سائٹ، روزنامہ ایکسپریس سنڈے میگزین‘ سندھی روزنامہ سوبھ، سندھی روزنامہ عبرت اور سندھی زبان کے جریدہ ہمسری میں بھی وقتاً فوقتاً۔مضامین قلمبند کرتے رہتے ہیں۔
Izhar Abbasi
===========================
