مصنوعی ذہانت نے اب کرکٹ کے میدان میں بھی انٹری دے دی ویمنز ورلڈ کپ میچ میں ٹاس سے قبل پچ رپورٹ پیش کی۔
بھارت اور سری لنکا میں کھیلے جا رہے آئی سی سی ویمنز ون ڈے ورلڈ کپ میں آج مصنوعی ذہانت نے کرکٹ کے میدان میں بھی انٹری دے دی اور ٹورنامنٹ کے دسویں میچ جو بھارت اور جنوبی افریقہ کے درمیان کھیلا جا رہا ہے میں گوگل جیمنائی نے پچ رپورٹ پیش کی۔
وشاکاپٹنم میں کھیلے گئے اس میچ میں آئی سی سی کی جانب سے پچ رپورٹ پیش کرنے کے لیے مصنوعی ذہانت کا استعمال کیا گیا۔
ٹاس سے قبل بھارتی کرکٹ ٹیم کی سابق کپتان اور موجودہ پریزنٹر متھالی راج پچ رپورٹ پیش کرنے آئیں تو ان کے ساتھ گوگل جیمنائی بھی موجود تھا۔
متھالی نے اپنے موبائل فون پر گوگل جیمنائی کے لائیو فیچر کو استعمال کرتے ہوئے کیمرے کے ذریعہ پچ کو دکھایا اور کہا کہ ہم ایک ون ڈے میچ کے لیے اے سی اے وی ڈی سی اے اسٹیڈیم وشاکا پٹنم میں موجود ہیں، اس وقت یہاں کا موسم گرم اور مرطوب ہے، تم اس پِچ کے بارے میں کیا کہتے ہو؟
گوگل جیمنائی نے جواب دیتے ہوئے کہا کہ لگتا ہے یہ پِچ بیٹرز کے لیے موزوں رہے گی۔
جیمنائی نے بتایا کہ پِچ ہموار اور سیدھی ہے اور اس پر زیادہ گھاس بھی نہیں ہے۔ گرم اور مرطوب موسم کا مطلب ہے کہ گیند بہت زیادہ سوئنگ نہیں ہوگی اور ممکن ہے کہ یہاں ایک ہائی اسکورنگ میچ دیکھنے کو ملے۔
اس کے بعد متھالی نے اپنے تجزیے میں بھی کہا یقینی طور پر یہ بیٹنگ کے لیے ایک اچھی پِچ ہے اور آج ایک ہائی اسکورنگ میچ ہوسکتا ہے۔
