لیورپول کے اسٹار فٹبالر محمد صلاح نے بدھ کے روز کاسابلانکا میں جیبوتی کے خلاف مصر کی 0-3 سے فتح میں دو گول کر کے اپنی ٹیم کو 2026 فیفا ورلڈ کپ کے لیے کوالیفائی کروا دیا۔
33 سالہ صلاح اب تک دو سال قبل شروع ہونے والی طویل کوالیفائنگ مہم میں نو گول کر چکے ہیں۔ اس فتح کے ساتھ مصر نے گروپ اے میں برکینا فاسو پر ناقابلِ شکست پانچ پوائنٹس کی برتری حاصل کر لی۔
دو مرتبہ افریقن فٹبالر آف دی ایئر کا اعزاز حاصل کرنے والے محمد صلاح نے گزشتہ سیزن میں لیورپول کو پریمیئر لیگ کا 20واں ٹائٹل جتوانے کے ساتھ ساتھ گولڈن بوٹ ایوارڈ بھی اپنے نام کیا تھا۔ تاہم اس سیزن میں وہ لیورپول کے ساتھ اپنی سابقہ فارم برقرار نہیں رکھ سکے اور اب تک تمام مقابلوں میں صرف تین گول کر پائے ہیں۔
جیبوتی کے خلاف میچ میں ابراہیم عادل نے آٹھویں منٹ میں پہلا گول کر کے مصر کو برتری دلائی، جس کے بعد صلاح نے دو بار (14ویں اور 84ویں منٹ میں) گیند کو جال میں پہنچا کر ٹیم کی برتری یقینی بنائی۔
مصر نے اگرچہ افریقہ کپ آف نیشنز سات بار جیت کر ریکارڈ قائم کیا ہے، لیکن ورلڈ کپ میں ان کی کامیابیاں محدود رہی ہیں۔ اب تک مصر صرف چار بار (1934، 1990، 2018 اور اب 2026) ورلڈ کپ کے لیے کوالیفائی کر پایا ہے۔
دوسری جانب، سابق آرسنل مڈفیلڈر تھامس پارٹے نے بھی گول کر کے گھانا کو وسطی افریقی جمہوریہ کے خلاف 0-5 سے کامیابی دلائی۔ گھانا کو اب اپنے آخری گروپ آئی میچ میں کوموروس کے خلاف صرف ایک پوائنٹ درکار ہے تاکہ وہ بھی ورلڈ کپ کے لیے کوالیفائی کر سکے۔
محمد سالیسو، الیگزینڈر جیکو، کپتان جورڈن ایو اور کمال الدین سلیمانا نے بھی گھانا کی جانب سے گول کیے۔ گھانا کے اب 22 پوائنٹس ہیں جبکہ مڈغاسکر تین پوائنٹس پیچھے ہے۔ مالی 15 پوائنٹس کے ساتھ دوڑ سے باہر ہو گیا۔
اسی دوران کیپ وردے نے طرابلس میں لیبیا کے خلاف دو گول کے خسارے کے بعد میچ 3-3 سے برابر کر کے اپنی پہلی ورلڈ کپ میں جگہ بنانے کی امیدیں برقرار رکھیں۔
بحرِ اوقیانوس کے قریب واقع تقریباً 5.5 لاکھ آبادی والے اس جزیرہ ملک کو پیر کے روز اسواتینی کے خلاف جیت کی صورت میں گروپ ڈی میں پہلا مقام حاصل ہو جائے گا۔
“بلو شارکس” کے نام سے مشہور کیپ وردے کے 20 پوائنٹس ہیں اور وہ کیمرون سے دو پوائنٹس آگے ہیں، جس نے ماریشس کو 0-2 سے شکست دی۔
کیمرون کو ورلڈ کپ کی دوڑ میں رہنے کے لیے ماریشس کے خلاف مکمل پوائنٹس حاصل کرنا ضروری تھا، اور آخرکار 92ویں منٹ میں کامیابی حاصل کی۔
نکولاس نگیملو نے 57ویں منٹ میں پہلا گول کیا، جب کہ برائن مبیومو نے اضافی وقت میں دوسرا گول کیا۔
اب کیمرون کو اپنا اگلا میچ انگولا کے خلاف جیتنا ضروری ہے تاکہ وہ براہِ راست کوالیفائی کر سکے یا کم از کم بہترین رنر اپ ٹیموں میں شامل ہو کر پلے آف میں جگہ بنا سکے۔
افریقی پلے آف میں چار رنر اپ ٹیمیں سیمی فائنل اور فائنل کھیلیں گی، جن کے فاتح بین البراعظمی پلے آف میں جائیں گے جہاں دو مزید ٹیموں کو ورلڈ کپ میں جگہ ملے گی۔
دوسری جانب، اسواتینی نے اگرچہ انگولا کے خلاف دو گول کی برتری حاصل کی تھی، مگر میچ 2-2 سے برابر ہو گیا۔ نئے فرانسیسی کوچ پیٹریس بیومیل کی زیرِ قیادت انگولا نے جوناتھن بواتو اور پاپیل آرِی کے گولز سے میچ بچا لیا۔
