اسلام آباد:وفاقی وزیر صحت سید مصطفیٰ کمال کی زیر صدارت پولیو خاتمے اور معمول کی حفاظتی ویکسینیشن پر اجلاس ہوا۔ڈبلیو ایچ او، یونیسیف اور گاوی کے نمائندگان نے اجلاس میں شرکت کرتے ہوئے ویکسینیشن منصوبوں پر تبادلہ خیال کیا۔
اجلاس میں سالانہ پولیو بجٹ کی کل لاگت، مالی و عملی پہلوؤں کا جائزہ لیا گیا۔اس موقع پر موجودہ ویکسینیشن مہم کی کارکردگی کا تفصیلی جائزہ بھی پیش کیا گیا۔
وفاقی وزیر صحت نے کہا کہ پولیو کا خاتمہ صرف حکومتی نہیں، بلکہ قومی ذمہ داری ہے۔ہر بچے تک ویکسین پہنچانے کے لیے عالمی شراکت داروں کے تعاون سے مؤثر حکمتِ عملی اپنائی جائے گی۔وفاقی وزیر نے تمام متعلقہ اداروں کو پولیو مہم میں شفافیت اور موثر عمل درآمد یقینی بنانے کی ہدایت کی۔
