پریس ریلیز
گوادر، 8 اکتوبر 2025:
یونیورسٹی آف گوادر کے شعبہ تعلیم نے کوالٹی انہانسمنٹ سیل QEC کے اشتراک سے “اساتذہ کا کردار برائے معیارِ تعلیم کی یقین دہانی” کے عنوان سے ایک سیمینار کا انعقاد کیا گیا۔ یہ پروگرام عالمی یومِ اساتذہ کے موقع پر منعقد کیا گیا جس کا مقصد اساتذہ کے اس اہم کردار کو اُجاگر کرنا تھا جو تعلیمی معیار کی بہتری اور ادارہ جاتی ترقی میں ریڑھ کی ہڈی کی حیثیت رکھتے ہیں۔
پروگرام کا آغاز تلاوتِ قرآنِ پاک سے ہوا، جس کے بعد فیکلٹی آف مینجمنٹ سائنسز، کامرس اور سماجی علوم کے ڈین پروفیسر ڈاکٹر جان محمد نے شرکاء کو خوش آمدید کہا۔ انہوں نے اپنے خطاب میں کہا کہ اساتذہ تعلیمی نظام کی بنیاد ہیں، ان کی پیشہ ورانہ صلاحیت اور کردار ہی کسی قوم کے مستقبل کا تعین کرتے ہیں۔تقریب کے مہمانِ خصوصی پروفیسر ڈاکٹر سید منظور احمد پرو وائس چانسلر، یونیورسٹی آف گوادر نے اپنے کلیدی خطاب “اعلیٰ تعلیم میں اساتذہ کا تبدیلی پیدا کرنے والا کردار میں کہا کہ ایک استاد محض علم کا ذریعہ نہیں بلکہ تبدیلی کا نمائندہ ہے جو طلبہ میں سوچنے، سمجھنے اور معاشرتی ترقی میں کردار ادا کرنے کا حوصلہ پیدا کرتا ہے۔
سیمینار کے دوران ضلعی تعلیم آفیسر محترمہ بلقیس سلیمان نے اساتذہ کی تربیت اور معاونت کے ذریعے اسکولوں کی مضبوطی کے موضوع پر اظہارِ خیال کرتے ہوئے کہا کہ اساتذہ کی پیشہ ورانہ تربیت اور رہنمائی ہی مضبوط تعلیمی اداروں کی ضمانت ہے۔
گوادر نجی اسکولز ایسوسی ایشن کے صدر جمیل قاسم نے نجی تعلیمی اداروں میں معیارِ تعلیم کے فروغ میں اساتذہ کا بدلتا ہوا کردارکے موضوع پر خطاب کرتے ہوئے کہا کہ نجی تعلیمی اداروں میں معیارِ تعلیم کو بہتر بنانے کے لیے اساتذہ کو جدید تدریسی طریقوں اور عملی تربیت سے ہم آہنگ کرنا ناگزیر ہے۔اس موقع پر منعقدہ مباحثے تعلیمی انتظام و پالیسی کے نفاذ میں اساتذہ کا مرکزی کردار میں ڈین فیکلٹی آف سوشل سائنسز پروفیسر ڈاکٹر جان محمد، ڈپٹی ڈی ای او گوادر عبدالوہاب مجید، پرنسپل ڈگری کالج گوادر نصیر احمد اور ماہر تعلیم و صدر آر سی ڈی سی ناصر رحیم سہرابی نے بطور مقرر شرکت کی۔ مقررین نے اس بات پر زور دیا کہ تعلیمی پالیسیوں کی کامیابی تب ہی ممکن ہے جب اساتذہ کو انتظامی و فیصلہ سازی کے عمل میں شامل کیا جائے۔
سیمینار کے اختتام پر وائس چانسلر یونیورسٹی آف گوادر پروفیسر ڈاکٹر عبدالرزاق صابر نے اپنے پیغام میں کہا کہ اساتذہ قوم کی فکری، علمی اور اخلاقی تعمیر میں مرکزی کردار ادا کرتے ہیں۔ انہوں نے کہا کہ ایک استاد نہ صرف علم فراہم کرتا ہے بلکہ کردار سازی، رہنمائی اور روشن مستقبل کی بنیاد رکھتا ہے۔ اساتذہ کی محنت، قربانی اور اخلاص سے ہی معاشرے میں شعور، ترقی اور امن کو فروغ ملتا ہے۔
انہوں نے مزید کہا کہ یونیورسٹی آف گوادر اپنے اساتذہ کے کردار اور خدمات کو قدر کی نگاہ سے دیکھتی ہے اور ہمیشہ ان کے لیے بہتر تعلیمی و تحقیقی ماحول فراہم کرنے کے لیے پُرعزم ہے۔ وائس چانسلر نے تمام اساتذہ کو خراجِ تحسین پیش کرتے ہوئے اس عزم کا اظہار کیا کہ یونیورسٹی آف گوادر علم، تحقیق اور تدریس کے میدان میں اپنے اساتذہ کی رہنمائی میں ترقی کے سفر کو مزید آگے بڑھائے گی۔
پروگرام کے آخر میں ڈاکٹر رابعہ اسلم نے معزز مہمانوں کا شکریہ ادا کیا اور انہیں شیلڈز اور سووینئرز پیش کی گئیں۔
یو جی پی آر
