بھارتی ریاست اتر پردیش سے تعلق رکھنے والے ایک شوہر نے اپنی بیوی سے متعلق دعویٰ کر کے ہر کسی کو حیران کر دیا۔
انڈین میڈیا کے مطابق محمود آباد تحصیل کے گاؤں لودھاسا کے رہائشی مراج نے سیتا پور کے ضلعی مجسٹریٹ سے ایک غیر معمولی شکایت کیلیے رجوع کیا۔
شکایت کنندہ مراج نے ضلعی مجسٹریٹ میں دعویٰ کیا کہ اس کی بیوی رات کو سانپ بن جاتی ہے جس کے خوف کی وجہ سے وہ سو نہیں پاتا۔
اس نے 4 اکتوبر کو عوامی شکایات کے ازالے کا دن ضلعی مجسٹریٹ ابھیشیک آنند کے سامنے اپنا حیران کن بیان دیا تھا۔
شوہر نے الزام لگایا کہ اس کی بیوی نسیمن کا ذہنی توازن درست نہیں ہے اور وہ راتوں کو سانپ بننے کا ڈرامہ کرتی ہے، سیٹیاں بجاتی اور مجھے ڈراتی ہے۔
اس نے یہ بھی بتایا کہ اس کی بارہا درخواستوں کے باوجود مقامی پولیس نے اس معاملے میں کوئی کارروائی نہیں کی جس کی وجہ سے مجھے ضلعی انتظامیہ سے مدد مانگنی پڑی۔
حکام اس غیر معمولی شکایت پر حیران ہیں جبکہ ضلعی مجسٹریٹ نے پولیس کو ہدایت دی کہ وہ اس معاملے کی تحقیقات کریں اور مناسب کارروائی کریں۔
ایک پولیس اہلکار نے کہا کہ ہمیں شکایت موصول ہوئی ہے اور معاملہ زیر تفتیش ہے۔
