ایشیا کپ میں پاکستان اور بھارت کے درمیان پیدا ہونے والے تنازعات کے بعد انٹرنیشنل کرکٹ کونسل (آئی سی سی) نے ویمنز ورلڈ کپ کے موقع پر احتیاطی اقدامات سخت کر دیے۔
بھارت کے خلاف میچ سے قبل قومی ویمنز ٹیم کی کپتان فاطمہ ثناء کی پریس کانفرنس کے دوران آئی سی سی کے میڈیا آفیسر نے صحافیوں کو ہدایت دی کہ سیاسی نوعیت یا ہینڈ شیک سے متعلق سوالات نہ کیے جائیں۔
آئی سی سی کی ہدایات کے بعد پریس کانفرنس کا آغاز ہوا، جہاں فاطمہ ثناء نے کہا کہ ٹیم نے بھارت کے خلاف میچ کے لیے بھرپور تیاری کی ہے، ہماری توجہ صرف کرکٹ پر ہے اور ہم میدان میں بہترین کارکردگی دکھانے کے لیے پُرعزم ہیں۔
انہوں نے بتایا کہ بھارت کے خلاف پلیئنگ الیون کا اعلان ابھی نہیں کیا جا سکتا، تاہم بنگلادیش سے شکست کے باوجود ٹیم کا حوصلہ بلند ہے اور وہ ایونٹ میں واپسی کے لیے پرعزم ہیں۔
ایک سوال کے جواب میں فاطمہ ثناء نے کہا کہ ماضی میں ٹیموں کے درمیان میل جول اور باہمی روابط خوشگوار ہوا کرتے تھے، لیکن اس وقت ان کی پہلی ترجیح صرف کرکٹ ہے۔ انہوں نے مزید کہا کہ انہیں بخوبی اندازہ ہے کہ میدان سے باہر کیا ہو رہا ہے، مگر وہ اور ان کی ٹیم صرف کھیل پر فوکس کر رہی ہیں۔
کپتان نے اپنے کیریئر کے حوالے سے بات کرتے ہوئے کہا کہ کم عمری میں قیادت سمیت کئی اعزازات حاصل کیے ہیں، ٹیم کی سینئر کھلاڑی ہمیشہ ان کا ساتھ دیتی ہیں، اور ہم سب ایک متحد ٹیم کے طور پر کھیلنے پر یقین رکھتے ہیں۔
