چیٹ جی پی ٹی بنانے والی کمپنی اوپن اے آئی نے ایک نئی خفیہ ایپلی کیشن ’سورا 2‘ایپ متعارف کرانے کا اعلان کیا ہے۔
ٹک ٹاک کی طرز پر تیار کی جانے والی نئی خفیہ ایپلی کیشن کا مقصد صارفین کو ایک مکمل اے آئی جنریٹڈ ویڈیو فیڈ فراہم کرنا ہے۔
اس ایپ کی خاص بات یہ ہے کہ اس پر آنے والی تمام ویڈیوز اے آئی سے تیار شدہ ہوں گی۔ یعنی صارف کو یہاں کوئی حقیقی شخص میک اپ کا ریویو کرتے، سیاسی تبصرے دیتے یا ٹرین اسٹیشن پر ڈانس کرتے نظر نہیں آئے گا۔
البتہ صارف اپنی تصویر استعمال کرکے ان ویڈیوز میں بطور ’’کیمیو‘‘ شامل ہو سکتا ہے یہ وہ فیچر ہے جو گوگل کے ویڈیو جنریشن سوفٹ ویئر ویو تھری میں شامل نہیں تھا۔ اس ایپلی کیشن کو ٹک ٹاک کا ممکنہ متبادل قرار دیا جا رہا ہے۔
اس ایپ کی ڈیمو ویڈیوز میں ایک ایسا کلپ دکھایا گیا جس میں ایک شخص بطخ پر گھڑ سوار کی طرح بیٹھا ہے لیکن یہ ایپ صرف مزے ہی نہیں بلکہ خطرناک امکانات بھی رکھتی ہے۔
یہ بات بھی حیران کن ہے کہ ایک اوپن اے آئی ملازم نے تو اپنے باس سیم آلٹمین کی جعلی سی سی ٹی وی فوٹیج بنائی جس میں وہ ایک اسٹور سے چوری کرتے دکھائی دیتے ہیں اور فخر سے بتایا کہ یہ اس وقت ایپ کی سب سے زیادہ دیکھی جانے والی ویڈیو ہے۔
اس ایپ میں صارفین اوپن اے آئی کے سورا جنریٹر کے ذریعے 10 سیکنڈ تک کی ویڈیوز بنا سکیں گے۔ تاہم صارفین اپنے کیمرہ رول یا دیگر ایپس سے ویڈیوز یا تصاویر اپ لوڈ نہیں کر سکیں گے۔
اس کے علاوہ یہ صرف اوپن اے آئی نے ہی نہیں بلکہ میٹا نے بھی چند دن پہلے اپنا نیا اے آئی ویڈیو پلیٹ فارم ’’وائبز‘‘ متعارف کرایا ہے، جس پر بنائے گئے کلپس انسٹاگرام اور فیس بک پر بھی ری پوسٹ کیے جاسکتے ہیں۔
ماہرین کا کہنا ہے کہ اس سب کے بعد انٹرنیٹ پر اے آئی ویڈیوز کی یلغار مزید بڑھ جائے گی۔ جیسے کہ وہ وائرل کلپ جس میں ایک خاتون شیشے کے پل پر پتھر گراتی ہے اور لوگ نیچے دریائی دھاروں میں جا گرتے ہیں۔ یہ کلپ تو جعلی تھا، مگر ایک میم بن چکا ہے اور اب کوئی بھی اس میں ’’پتھر گرانے والا کردار‘‘ بن سکتا ہے۔
یہ منصوبہ اگر عملی شکل اختیار کر لیتا ہے تو یہ سوشل میڈیا کے ماحول میں ایک نیا تجربہ ثابت ہو سکتا ہے، لیکن اس کے ساتھ صارف کی پرائیویسی، کاپی رائٹ اور شناخت کے تحفظ جیسے اہم مسائل بھی سامنے آئیں گے۔
https://x.com/F530Josh/status/1971420729032806499?ref_src=twsrc%5Etfw%7Ctwcamp%5Etweetembed%7Ctwterm%5E1971420729032806499%7Ctwgr%5E1364b2a1f267cfddeb914e69a66fa8b73a2fffbe%7Ctwcon%5Es1_&ref_url=https%3A%2F%2Furdu.arynews.tv%2Fopenai-launches-tiktok-competitor-app-sora-tiktok-competitor-app%2F























