فیفا نے 2026 ورلڈ کپ کے لیے آفیشل میچ بال کی رونمائی کر دی ہے، جو جدید ٹیکنالوجی اور ڈیزائن کی تفصیلات پر مشتمل ہے اور تین میزبان ممالک – امریکا، میکسیکو اور کینیڈا – کو خراجِ تحسین پیش کرتا ہے۔
یہ بال، جس کا نام ٹریونڈا (Trionda) رکھا گیا ہے، جرمن کمپنی ایڈیڈاس نے ڈیزائن کیا ہے، جو 1970 کے ٹورنامنٹ سے فیفا ورلڈ کپ کے لیے آفیشل بال فراہم کر رہی ہے۔
فیفا کے صدر جیانی انفانتینو نے نیویارک میں منعقدہ تقریب میں بال کی رونمائی کرتے ہوئے کہا: “ٹریونڈا کو پیش کرتے ہوئے مجھے بے حد خوشی اور فخر ہے۔”
یہ پہلا ورلڈ کپ ہے جو تین ممالک میں منعقد ہو رہا ہے اور اس میں 48 ٹیمیں حصہ لیں گی۔ اسی تصور نے بال کے نام اور ڈیزائن کو متاثر کیا، جس میں سرخ، نیلے اور سبز رنگ شامل ہیں۔
ہر میزبان ملک کی علامتیں بھی بال میں نمایاں کی گئی ہیں: کینیڈا کے میپل کے پتے، میکسیکو کا عقاب اور امریکا کے ستارے، جبکہ ایک مثلث تینوں ممالک کی اتحاد کی نشانی کے طور پر شامل کیا گیا ہے۔
بال میں جدید ٹیکنالوجی بھی استعمال کی گئی ہے، جیسے گہرے سیونز جو پرواز کے دوران بہتر توازن فراہم کرتے ہیں اور خاص ابھری ہوئی ڈیزائننگ جو نمی یا بارش میں گرفت کو بہتر بناتی ہے۔ اس کے علاوہ ایک موشن سینسر چپ بھی لگائی گئی ہے جو بال کی حرکت کا ڈیٹا ویڈیو اسسٹنٹ ریفری (VAR) کو منتقل کرے گی۔
یہ رونمائی شمالی امریکا میں ہونے والے ورلڈ کپ کے کاؤنٹ ڈاؤن کا ایک اہم سنگِ میل ہے، جو اگلے سال 11 جون سے 19 جولائی تک کھیلا جائے گا۔
فیفا نے آن لائن مرحلہ وار ٹکٹ سیل کا آغاز کر دیا ہے، جس میں اب تک 216 ممالک اور خطوں سے 45 لاکھ سے زائد شائقین پری سیل ڈرا میں شامل ہو چکے ہیں۔
ٹورنامنٹ کا آفیشل ڈرا 5 دسمبر کو واشنگٹن میں منعقد ہوگا۔
