کھیل کے میدان میں ہندوستانی جہاز گرانے والے حارث
روف اور وکٹ پر فائرنگ کرنے والے صاحبزادہ فرحان کو اب اندازہ ہوجانا چاہئے کہ اصل کامیابی پرفارم کرنے سے حاصل ہوتی ہے۔ اشارے بازی، جملے بازی، خوش آمد، طنز اور مسخرے پن یا جہالت کے مظاہروں سے بس تھوڑی دیر تک کام چل سکتا ہے۔ خود کو منوانے کے لئے پاکستان جیسے ملک میں بھی کبھی کبھی پرفارم کرنا پڑتا ہے۔
لیکن تم دونوں کا بھی زیادہ قصور نہیں۔ تم دونوں نے اپنی پیدائش ہی سے اس ملک میں یہی دیکھا ہے کہ یہاں پرفارم کرنے سے زیادہ “خوش” کرنے سے کامیابی ملتی ہے۔ تم نے اپنی آنکھوں سے دیکھا کہ حسن علی نے ایک معمولی کھلاڑی ہونے کے باجود، واہگہ بارڈر پہنچ کر، وہاں موجود ہندوستانی شہریوں کو اپنے ہاتھ سے لعنت بھیجی، اور دیگر غلط اشارے بھی کئے، اور یوں ٹیم میں اپنا چانس بہت دنوں کے لئے پکا کرلیا۔
تم اپنے بڑوں اور سینئیر کھلاڑیوں سے سن ہی چکے ہو کہ ایک ہٹ دھرم کپتان نے صرف پسندیدگی کی بنیاد پر منصور اختر جیسے نالائق کھلاڑی کو زبردستی انیس ٹیسٹ اور چالیس سے زائد ایک روزہ میچز کھلادئیے۔
تم دونوں کو اچھی طرح اندازہ ہے کہ ہندوستان میں مودی کی حکمرانی کے دوران اب وہاں بھی خوش آمدیوں کی بہار آگئی ہے؛ اور اب وہاں بھی میرٹ کی حیثیت ثانوی ہو جانے کے سبب کھلاڑی پرفارم کرنے کے ساتھ ساتھ سیاسی ٹوٹکے بھی سیکھ رہے ہیں؛ سوریا کمار یادو اس صورتحال کی ایک بھونڈی ترین مثال ہے۔ لہذا تم دونوں کو اچھی طرح معلوم ہوگیا کہ یہاں پرفارم کرنے سے زیادہ ہندوستانیوں کے خلاف جملے بازیوں اور سرکس دکھانے سے پاکستانی حکام اور عوام زیادہ خوش ہوں گے؛ اور اگلی سیریز اور ٹورنامنٹ میں تم دونوں کا چانس یقینی ہوجائے گا۔
بس تم دونوں کو یہاں یہ یاد دلانا ضروری ہے کہ تاریخ میں ہاتھ کے اشارے سے نہ تو کوئی جہاز گرا ہے؛ اور نہ ہی بندوق کی ثقافت میں کبھی بھی کوئی طاقت رہی ہے۔ ایسا کرنے والوں اور ایسی ثقافت پر بھروسہ کرنے والوں کی تاریخ انتہائی شرمناک ہے۔
گزشتہ روز دنیا نے دیکھا کہ حارث کا جہاز اور فرحان کی بندوق قوم کے ایک فی صد بھی کام نہیں آئی۔ جب کہ ہندوستانی کھلاڑیوں نے، اپنی ہٹ دھرم حکومت اور متعصب بورڈ حکام کو ایک طرف رکھ کر، میدان میں پرفارم کیا، تمہیں مارا پیٹا اور ایک ٹورنامنٹ میں تمہیں تین بار شکست دے کر ایک انوکھا ریکارڈ قائم کیا؛ ایسا ریکارڈ جسے کرکٹ کے مستقبل کا کوئی غیر معمولی معجزہ ہی توڑ سکتا ہے۔
By-Tahir Hasan Khan
