بھارتی کرکٹ بورڈ نے ایشیا کپ 2025 کی ٹرافی سے متعلق تنازع کو انٹرنیشنل کرکٹ کونسل (آئی سی سی) کے سامنے پیش کرنے کا اعلان کر دیا ہے۔
اس بارے میں بات کرتے ہوئے بھارتی بورڈ کے سیکریٹری دیوا جیت سائیکیا نے بتایا کہ آئی سی سی کا اجلاس نومبر کے پہلے ہفتے میں دبئی میں ہوگا، جہاں ایشین کرکٹ کونسل (اے سی سی) کے چیئرمین کے رویے پر باضابطہ احتجاج ریکارڈ کرایا جائے گا۔
دیوا جیت سائیکیا کا کہنا تھا کہ بھارتی بورڈ ابتدا ہی سے حکومتی پالیسی کے مطابق آگے بڑھ رہا ہے، ایشیا کپ ایک کثیر القومی ایونٹ ہے اور ہم صرف باہمی سیریز سے اجتناب کرتے ہیں۔
انہوں نے مزید کہا کہ پاکستان کے خلاف کامیابی پر ہمیں بھارتی ٹیم پر فخر ہے، اور اسی پالیسی کے تحت ہم نے اے سی سی کے چیئرمین محسن نقوی سے ٹرافی نہ لینے کا فیصلہ کیا، کیونکہ وہ پاکستان حکومت کے اہم رہنما ہیں۔
سائیکیا کے مطابق ٹرافی اور میڈلز پاکستان ہی لے گیا ہے، لیکن توقع ہے کہ یہ جلد بھارت کو واپس ملیں گے۔ اس موقع پر انہوں نے اعلان کیا کہ پاکستان کو کھیل کے میدان میں شکست دینے پر بھارتی اسکواڈ کو 21 کروڑ روپے کا انعام دیا جائے گا۔
