بھارتی کرکٹ بورڈ کی ہدایت پر بھارتی ٹیم نے ایک بار پھر ضدی رویہ اختیار کیا اور ایشین کرکٹ کونسل (اے سی سی) کے صدر محسن نقوی سے ٹرافی لینے سے انکار کر دیا۔
پاکستانی کھلاڑیوں سے مصافحہ نہ کرنے کے بعد بھارتی ٹیم نے ایشیا کپ جیتنے کے باوجود اپنی ہٹ دھرمی برقرار رکھی۔ دبئی کرکٹ اسٹیڈیم میں منعقدہ فائنل کی اختتامی تقریب بھی اسی وجہ سے تاخیر کا شکار ہوئی۔ تاہم محسن نقوی نے بھی مؤقف اپنایا کہ بھارتی کھلاڑی ٹرافی کسی اور سے بھی وصول نہیں کریں گے۔
بعد ازاں بی سی سی آئی نے اے سی سی کو باضابطہ طور پر اطلاع دی کہ بھارتی ٹیم ٹرافی وصول نہیں کرے گی، جس کے بعد ٹرافی کو واپس بلا لیا گیا۔ تقریب کے میزبان سائمن ڈول نے بتایا کہ انہیں اے سی سی کی جانب سے آگاہ کیا گیا تھا کہ بھارتی ٹیم اس روز ٹرافی نہیں اٹھائے گی۔
یاد رہے کہ ایشیا کپ کے دوران بھارتی ٹیم پر اسپورٹس مین اسپرٹ کی خلاف ورزی کے الزامات لگے، کیونکہ نہ تو بھارتی کھلاڑیوں نے پاکستانی ٹیم سے ہاتھ ملایا اور نہ ہی فائنل سے قبل بھارتی اور پاکستانی کپتان نے مشترکہ تصویر بنوائی۔
