بھارت نے سنسنی خیز مقابلے کے بعد پاکستان کو 5 وکٹوں سے شکست دے دی۔ میچ غیر متوقع طور پر سخت ثابت ہوا کیونکہ کسی نے امید نہیں کی تھی کہ پاکستان اتنی زبردست فائٹ کرے گا۔
پاکستان نے پہلے کھیلتے ہوئے 146 رنز بنائے۔ اوپنرز نے شاندار آغاز کیا مگر اس کے بعد بیٹنگ لائن اپ بڑے دباؤ کا شکار ہوگئی۔ صاحبزادہ فرحان نے 57 اور فخر زمان نے 46 رنز بنائے، لیکن باقی بلے باز بری طرح ناکام رہے۔ سائم ایوب 14، محمد حارث صفر، سلمان آغا 8، محمد نواز 6 اور حسین طلعت صرف 1 رن بنا سکے۔ بھارت کی جانب سے کلدیپ یادو نے شاندار بولنگ کرتے ہوئے 4 وکٹیں حاصل کیں۔
ہدف کے تعاقب میں بھارتی بیٹنگ لائن بھی ابتدا میں مشکلات کا شکار رہی۔ ابھشیک شرما 5، شبمن گل 12 اور کپتان سوریا کمار یادو صرف 1 رن بنا کر آؤٹ ہوئے۔ پاکستان کی طرف سے فہیم اشرف نے 3 جبکہ شاہین آفریدی نے 1 وکٹ حاصل کی۔
اس کے بعد تلک ورما نے شاندار بلے بازی کا مظاہرہ کرتے ہوئے ناٹ آؤٹ 69 رنز بنائے اور اپنی ٹیم کو 2 گیندیں قبل ہدف تک پہنچا دیا۔
