ایشیا کپ کے فائنل کے لیے قومی کرکٹ ٹیم کی ممکنہ الیون سامنے آگئی ہے۔ گرین شرٹس ایونٹ کے گروپ اور سپر فور مرحلے میں بھارت سے ہونے والی دو ناکامیوں کا حساب چکانے کے لیے پرعزم ہیں۔
تاہم ٹیم کی بیٹنگ لائن خاص طور پر اوپنر صائم ایوب کی فارم تشویش کا باعث ہے۔ بائیں ہاتھ کے یہ نوجوان بلے باز چھ اننگز میں صرف 23 رنز بنا سکے ہیں، ان کا اوسط 3.83 اور اسٹرائیک ریٹ 85.18 ریکارڈ کیا گیا ہے۔
گروپ میچز میں اومان، بھارت اور متحدہ عرب امارات کے خلاف تینوں مرتبہ بغیر کھاتہ کھولے آؤٹ ہونے والے 23 سالہ کھلاڑی نے سپر فور مرحلے میں بھارت کے خلاف 17 گیندوں پر 21 رنز بنا کر کچھ مزاحمت دکھائی۔ تاہم بعد ازاں سری لنکا کے خلاف صرف 2 رنز بنانے کے بعد بنگلہ دیش کے خلاف ورچوئل سیمی فائنل میں ایک بار پھر صفر پر پویلین لوٹ گئے، جو ٹورنامنٹ میں ان کا چوتھا ڈک تھا۔
ذرائع کے مطابق، بھارت کے خلاف فائنل میں وہی ٹیم میدان میں اترے گی جس نے سیمی فائنل نما مقابلے میں بنگلہ دیش کو شکست دی تھی۔
کپتان سلمان علی آغا نے صائم ایوب پر اعتماد کا اظہار کرتے ہوئے کہا کہ وہ ایک ایسے ہنر مند کھلاڑی ہیں جو اگلے 10 برس تک پاکستان کی نمائندگی کر سکتے ہیں۔ ان کے مطابق، صائم ایوب نے بولنگ اور فیلڈنگ میں شاندار کارکردگی دکھائی ہے اور امید ہے کہ وہ فائنل میں بیٹنگ سے بھی متاثر کریں گے۔
