ایشیا کپ کے فائنل سے قبل بھارتی میڈیا نے اپنی ہی ٹیم پر سوالات اٹھانا شروع کر دیے ہیں۔
سری لنکا کے خلاف سپر فور مرحلے کے میچ میں سپر اوور سے حاصل ہونے والی جیت کے باوجود بھارتی میڈیا ٹیم کی کارکردگی پر پریشان دکھائی دیا۔ ان کے مطابق بھارت نے 202 رنز بنائے تو سری لنکا نے بھی اتنے ہی رنز بنا ڈالے، جو بھارتی ٹیم کے لیے خطرے کی گھنٹی ہے۔ میڈیا کا کہنا تھا کہ ایک موقع پر سری لنکا میچ جیت چکا تھا اور اس حقیقت کو ماننا ہوگا۔
پاکستان کے خلاف فائنل سے متعلق بھارتی میڈیا نے زور دیا کہ ٹیم کو بھرپور تیاری کے ساتھ میدان میں اترنا ہوگا۔ ان کے مطابق 14 اور 21 ستمبر کے میچز کو بھلا دینا چاہیے کیونکہ 28 ستمبر کا میچ بالکل مختلف ہوگا اور اس بار مقابلہ پاکستان سے ہے۔
بھارتی میڈیا نے کھلاڑیوں کو یہ بھی یاد دلایا کہ 2017 کی چیمپئنز ٹرافی والی غلطی نہ دہرائی جائے۔ اُس وقت گروپ میچ میں پاکستان کو آسانی سے ہرایا گیا تھا لیکن فائنل میں حریف کو ہلکا لینے کی بھاری قیمت چکانی پڑی تھی۔
ان کا کہنا ہے کہ بھارتی ٹیم کو اپنی کامیابیوں سے بھی سبق سیکھنا ہوگا اور فائنل میں ایسی غلطیوں سے بچنا ہوگا۔
