بالی ووڈ کے معروف پنجابی اداکار دلجیت دوسانجھ نے ملائیشیا میں اپنے کنسرٹ کے دوران بھارتی حکومت اور میڈیا کو شدید تنقید کا نشانہ بنایا اور اپنی فلم سردار جی 3 پر عائد پابندی کو بلاجواز قرار دیا۔
انہوں نے کہا کہ یہ بات حیران کن ہے کہ ایک طرف ان کی فلم پر پابندی لگائی گئی، جبکہ دوسری جانب ایشیا کپ 2025 بدستور جاری ہے۔
مداحوں سے گفتگو کرتے ہوئے دلجیت نے وضاحت دی کہ سردار جی 3 کی شوٹنگ فروری میں مکمل ہوئی تھی، جب کہ پہلگام واقعہ اپریل میں پیش آیا۔ ان کے مطابق سب ہی چاہتے ہیں کہ مجرموں کو سزا ملے، لیکن حقیقت یہ ہے کہ ان کی فلم واقعے سے پہلے بنائی گئی، جبکہ اس دوران کرکٹ مقابلے بھی ہوتے رہے۔
کنسرٹ کے دوران جب ایک شخص نے بھارتی پرچم لہرایا تو دلجیت نے کہا کہ یہ ان کے ملک کا پرچم ہے اور اس کے لیے ہمیشہ دل میں احترام رہے گا۔ تاہم ساتھ ہی انہوں نے بھارتی میڈیا پر برہمی کا اظہار کرتے ہوئے کہا کہ میڈیا انہیں غدار قرار دینے کی کوشش کر رہا ہے، حالانکہ پنجابی اور سکھ اپنے ملک سے کبھی بے وفائی نہیں کرسکتے۔
واضح رہے کہ پہلگام واقعے کے بعد فلم فیڈریشن آف انڈیا نے سردار جی 3 پر پابندی اور دلجیت دوسانجھ کے بائیکاٹ کا مطالبہ کیا تھا۔ اگرچہ فلم بھارت میں ریلیز نہ ہوسکی، لیکن عالمی سطح پر اسے غیر معمولی پذیرائی ملی۔
دلجیت کا یہ بیان ایسے وقت میں سامنے آیا ہے جب بھارت اور پاکستان کے درمیان کشیدگی کے باوجود کرکٹ ٹورنامنٹس بدستور جاری ہیں۔ ان کا مؤقف ہے کہ انصاف کا تقاضا یہی ہے کہ سب کے لیے ایک ہی معیار اختیار کیا جائے۔ ان کے یہ خیالات بھارتی میڈیا اور حکومتی پالیسیوں پر بڑا سوالیہ نشان ہیں۔
