ایشیا کپ کی 41 سالہ تاریخ میں ایک تاریخی لمحہ آنے کو ہے جس کا کرکٹ کے دیوانے طویل عرصے سے انتظار کر رہے تھے۔ روایتی حریف پاکستان اور بھارت 28 ستمبر کو ایشیا کپ 2025 کے فائنل میں ایک دوسرے سے ٹکرائیں گے۔
1984 میں ایشیا کپ کے آغاز سے اب تک کئی سنسنی خیز مقابلے ہوئے، لیکن حیرت انگیز طور پر کبھی بھی پاکستان اور بھارت فائنل میں آمنے سامنے نہیں آئے۔ بھارت اب تک 8 بار ٹائٹل جیت چکا ہے (1984، 1988، 1990-91، 1995، 2010، 2016، 2018 اور 2023)، جبکہ پاکستان صرف 2 بار (2000 اور 2012) یہ اعزاز اپنے نام کر پایا۔
پاکستان کا فائنل تک سفر
پاکستانی ٹیم نے ٹورنامنٹ میں شاندار کھیل پیش کیا۔ اگرچہ بھارت سے دونوں میچ ہارے، مگر باقی مقابلوں میں شاندار فتوحات کے ساتھ فائنل تک رسائی حاصل کی:
عمان کے خلاف 93 رنز سے کامیابی (12 ستمبر)
یو اے ای کو 41 رنز سے شکست (17 ستمبر)
سری لنکا کے خلاف 5 وکٹوں سے جیت (23 ستمبر)
بنگلہ دیش کو 11 رنز سے ہرا کر فائنل میں جگہ بنائی (25 ستمبر)
بھارت کی ناقابل شکست مہم
سوریا کمار یادو کی قیادت میں بھارتی ٹیم نے اب تک ٹورنامنٹ میں کسی کو موقع نہیں دیا اور ناقابل شکست رہی۔
یو اے ای کو 9 وکٹوں سے ہرایا (10 ستمبر)
پاکستان کو 7 وکٹوں سے شکست دی (14 ستمبر)
عمان کے خلاف 21 رنز سے کامیابی (19 ستمبر)
پاکستان کو 6 وکٹوں سے ہرایا (21 ستمبر)
بنگلہ دیش کو 41 رنز سے مات دے کر فائنل میں جگہ بنائی (24 ستمبر)
فیصلہ کن معرکہ
اب 28 ستمبر کا فائنل سب کی توجہ کا مرکز ہے۔ بھارت پاکستان کے خلاف ہیٹ ٹرک کی جستجو میں ہے، جبکہ پاکستان بدلے کی نیت سے میدان میں اترے گا۔ یہ مقابلہ ایشیا کپ کی تاریخ کا سب سے یادگار فائنل بننے کی توقع ہے۔
