شاہ رُخ خان کے بیٹے آریان خان کی تحریر اور ہدایتکاری میں بننے والی ویب سیریز The Bads of Bollywood* نیٹ فلکس پر ریلیز ہوتے ہی شہرت اور داد سمیٹنے کے ساتھ ساتھ تنازع کا شکار بھی ہو گئی ہے۔
سات اقساط پر مشتمل اس بڑے بجٹ کی سیریز کی پروڈکشن آریان کے والدین شاہ رُخ خان اور گوری خان نے کی ہے، جس میں کئی بڑے بالی ووڈ ستارے جلوہ گر ہوئے ہیں، جن میں رنبیر کپور، رنویر سنگھ، سلمان خان، عامر خان، ارشد وارثی، دیشا پٹانی، عمران ہاشمی اور ارجن کپور شامل ہیں۔
تاہم، ایک سین میں رنبیر کپور کو ای-سگریٹ (ویپ) استعمال کرتے دکھانے پر معاملہ تنازع میں بدل گیا۔ نیشنل ہیومن رائٹس کمیشن نے اس پر اعتراض اٹھاتے ہوئے ممبئی پولیس اور وزارتِ اطلاعات و نشریات کو خط لکھا ہے۔
شکایت میں مؤقف اپنایا گیا ہے کہ بغیر وارننگ یا احتیاطی نوٹ کے ای-سگریٹ کا استعمال دکھانا نوجوانوں پر منفی اثر ڈال سکتا ہے، جو Prohibition of Electronic Cigarettes Act 2019 کی خلاف ورزی کے زُمرے میں آتا ہے۔ اسی تحت رنبیر کپور، پروڈیوسرز اور نیٹ فلکس کے خلاف کارروائی اور ایف آئی آر درج کرنے کا مطالبہ کیا گیا ہے۔
