بھارتی کرکٹ ٹیم کے کپتان سوریا کمار یادیو نے کہا ہے کہ پاکستان کے خلاف میچز میں بھارت کی کامیابی کا تناسب تقریباً 1-10 ہے، اس لیے اب پاکستان ہماری ٹیم کے لیے اصل حریف نہیں رہا۔ میچ کے بعد پریس کانفرنس میں ان کا کہنا تھا کہ ہم نے وکٹ کی صورتحال دیکھ کر پہلے فیلڈنگ کا انتخاب کیا۔ ان کے مطابق میچ کا اصل رخ دسویں اوور کے بعد تبدیل ہوا، وقفے کے بعد بھارتی باؤلرز نے شاندار کارکردگی دکھائی تاہم فیلڈنگ میں کئی غلطیاں ہوئیں اور یوں لگا جیسے کیچ چھوڑنے والوں کے ہاتھوں میں مکھن لگا ہو۔
سوریا کمار یادیو نے مزید کہا کہ ابھیشیک کا بیٹنگ اسٹائل منفرد اور بے لوث ہے۔ پاور پلے میں وہ جارحانہ کھیل پیش کرتا ہے لیکن بعد میں حالات کو سمجھ کر ذمہ داری نبھاتا ہے۔ وہ ہر میچ سے سیکھنے کی کوشش کرتا ہے اور سب سے بڑھ کر یہ کہ وہ کبھی پریکٹس کو نظرانداز نہیں کرتا۔ چاہے بیٹنگ کا موڈ نہ بھی ہو، وہ پھر بھی گراؤنڈ میں موجود رہتا ہے اور اپنی محنت جاری رکھتا ہے۔ کپتان نے کہا کہ جب کھلاڑی اتنی مستقل مزاجی سے محنت کرے تو قدرت بھی اس کے لیے کامیابی کے دروازے کھول دیتی ہے۔
