پاکستان کرکٹ ٹیم آل راؤنڈر سلمان علی آغا کی قیادت میں ایشیا کپ کے سپر فور مرحلے میں جگہ بنانے میں کامیاب ہوگئی ہے، جہاں اتوار کو روایتی حریف بھارت سے ٹکراؤ ہوگا۔
نجی ٹی وی “جیو نیوز” کے مطابق جمعے کے روز آئی سی سی اکیڈمی میں پریکٹس شروع کرنے سے قبل ٹیم ہوٹل میں کھلاڑیوں اور مینجمنٹ کے درمیان ایک خصوصی میٹنگ ہوئی۔ اس سیشن میں کھلاڑیوں نے کھل کر گفتگو کی اور بلے بازوں نے اپنی ناکامی کا اعتراف بھی کیا۔
بیٹرز نے مینجمنٹ کے اعتماد پر شکریہ ادا کرتے ہوئے یقین دلایا کہ آئندہ میچوں میں بہتر کھیل پیش کریں گے۔ کوچ مائیک ہیسن نے کھلاڑیوں کو ہدایت دی کہ آنے والے مقابلوں میں اسٹرائیک کو گھمانا کلیدی کردار ادا کرے گا۔ انہوں نے تسلیم کیا کہ بیٹنگ کے لیے کنڈیشنز آسان نہیں ہیں، تاہم ٹیم کو بڑی اننگز اور ذمہ دارانہ بیٹنگ کی اشد ضرورت ہے۔
اہم کھلاڑیوں کا کہنا تھا کہ وہ کوشش کریں گے کہ وکٹ پر جم کر کھیلا جائے اور ساتھ ہی سنگلز اور ڈبلز لے کر اننگز کو آگے بڑھایا جائے۔ کوچ نے بھی سپر فور مرحلے میں بہترین پرفارمنس کی توقع ظاہر کی، جبکہ کھلاڑیوں نے عزم دہرایا کہ وہ ٹیم کو فتح کی راہ پر ڈالنے کے لیے اپنی بھرپور صلاحیتیں استعمال کریں گے۔
