بھارت نے ایک بار پھر پاکستانی گانا چرا کر اپنی روایت کو دہرایا ہے۔ اس بار پاکستان کا مقبول گانا “بول کفارہ” بھارتی فلم میں شامل کیا گیا ہے۔
یہی قوالی سات سال قبل ایک نجی ٹی وی کے ڈرامہ پارلر والی لڑکی کے لیے او ایس ٹی کے طور پر ریکارڈ کی گئی تھی، جس نے ریلیز ہوتے ہی شاندار مقبولیت حاصل کی اور پاکستان سمیت دنیا بھر میں سننے والوں کے دل جیت لیے۔
بھارتی انڈسٹری کی جانب سے پاکستانی گانوں کو بغیر کریڈٹ کے کاپی کرنا کوئی نیا عمل نہیں۔ اس سے پہلے بھارتی گلوکار جُبِن نوٹیال بھی یہ گانا گا چکے ہیں، جو بھارت میں کافی مقبول ہوا تھا۔ اب گلوکارہ نیہا ککڑ نے اسی نغمے کو فلم “ایک دیوانے کی دیوانیت” کے لیے گایا ہے، جس میں مرکزی کردار اداکار ہریش وردھن رہانے اور اداکارہ سونم باجوا نے نبھائے ہیں۔
دلچسپ پہلو یہ ہے کہ ہریش وردھن ماضی میں پاکستان اور اداکارہ ماورہ حسین کے خلاف بیانات دے چکے ہیں، مگر اب وہ انہی پاکستانی گانوں پر فلم کروا رہے ہیں جنہیں بھارت بار بار کاپی کرتا رہا ہے۔
سونم باجوا پر فلمائے گئے اس نئے ورژن کے بعد پاکستانی سوشل میڈیا صارفین نے سخت ردعمل دیا ہے۔ ایک صارف نے لکھا: “پاکستان کو برا کہو گے لیکن گانے ہمارے ہی چراؤ گے”۔ ایک اور نے طنزیہ کہا: “سونم باجوا یہ گانا IAF سے PAF کے نام کر رہی ہیں”۔ کئی صارفین نے حسبِ روایت بالی ووڈ کو “کاپی ووڈ” کا لقب دے ڈالا۔
