شیخ الجامعہ این ای ڈی ڈاکٹر محمد طفیل اور چئیرپرسن شعبہ کمپیوٹر سائنس ڈاکٹر شہنیلہ زرداری طالب علم کو گولڈ میڈل اور سرٹیفیکٹ دیتےہوۓ
ملکی انجینئرنگ کی باگ بھی نوجوان نسل ہی کو سنبھالنی ہے، امین ہاشوانی
ہم نے ایک بہترین نسل تیار کردی ہے جو قوم کی ترقی میں کردار ادا کرے گی، ڈاکٹر طفیل
این ای ڈی میں چونتیسواں سالانہ جلسہ تقسیمِ اسناد منعقد
کراچی() ملکی انجینئرنگ کی باگ بھی اسی نوجوان نسل کو سنبھالنی ہے، تعلیمی اداروں کی گراں قدر خدمات سے ہماری معاشی و معاشرتی اڑان ممکن ہے، اصلاح دنیا سے قبل اپنی تہذیبِ نفس کرنا ضروری ہے، ان خیالات کا اظہار ایگزیکٹو ڈائریکٹر ہاشوانی گروپ آف کمپنیز امین اے ہاشوانی نے جامعہ این ای ڈی کے 34ویں کانووکیشن میں کیا۔ ان کا کہنا تھا کہ مولانا جلال الدین محمد رومی نے کہا کہ اصلاح دنیا کرنے سے قبل اپنی تہذیبِ نفس کرنا ضروری ہے، اگر آپ سب اپنی اصلاح کرنے میں کامیاب ہوجائیں تو یقین جانیے معاشرہ خودبخود بہتری کی راہ پر گامزن ہوگا ۔ ان کا مزید کہنا تھا کہ ملکی ترقی میں نوجوانوں کا کردار ہمیشہ سے اہم رہا ہے اور رہے گا۔ ملکی انجینئرنگ کی باگ بھی اسی نوجوان نسل کو سنبھالنی ہے، تو کیوں نہ آج سے عہد کریں کہ ہم خود اپنی اصلاح کریں گے۔ کانووکیشن سے خطاب کرتے ہوۓ ان کا مزید کہنا تھا کہ تعلیمی اداروں کی گراں قدر خدمات سے ہماری معاشی و معاشرتی اڑان ممکن ہے۔ میں شیخ الجامعہ پروفیسر ڈاکٹر محمد طفیل اور سابقہ وائس چانسلر/ ایمریٹس پروفیسر ڈاکٹر سروش حشمت لودھی، جامعہ کی کراچی اور تھرپارکر کی ٹیموں کو مبارک باد پیش کرتا ہوں جن کی کاوشوں سے جامعہ اور تھر انسٹی ٹیوٹ ترقی کی منازل کی جانب رواں دواں ہے۔ جامعہ این ای ڈی کے چونتسویں کانووکیشن کے
استقبالیہ سے خطاب کرتے ہوئے شیخ الجامعہ ڈاکٹر محمد طفیل کا کہنا تھاکہ وفاقی حکومت، صوبائی حکومت، جامعہ کی انتظامیہ، آپ کے اساتذہ، ان کا تحقیقی ماحول سب نے مِل کر، بہترین تعلیمی ماحول میسر کیا تو آپ طالب علم، فخر سے سر بلند کرکے یہاں ڈگری حاصل کررہے ہیں۔ میں باحیثیت سربراہ اور استاد سمجھتا ہوں کہ ہم نے ایک بہترین نسل تیار کردی ہے جو ملک و قوم کی ترقی و خوشحالی میں اپنا مثالی کردار ادا کرے گی۔ سیکریٹری یونی ورسٹیز اینڈ بورڈز محمد عباس بلوچ، شیخ الجامعہ، معزز مہمانوں سمیت پرووائس چانسلر ڈاکٹر محمد نعمان اور رجسٹرار سید غضنفر حسین نقوی نے طالب علموں کو اسناد و میڈلز سے نوازا۔ جامعہ کی ترجمان فروا حسن کے مطابق اس جلسہ تقسیم 2025 میں این ای ڈی یونی ورسٹی نے اپنی تاریخ میں پہلی بار 37 اسکالرز کو ڈاکٹریٹ کی اسناد تفویض کی۔ جن میں ڈاکٹر محمد سعد خان، ڈاکٹر عبدالغفار، ڈاکٹر عاطف شہزاد، ڈاکٹر محمد فہد ریاض، ڈاکٹر محمد عدیل، ڈاکٹر صائمہ رضا زیدی، ڈاکٹر معصومہ عباس، ڈاکٹر سید محمد زاہد، ڈاکٹر عمر صدیقی، ڈاکٹر شہیر یوسف، ڈاکٹر حرا سلطان، ڈاکٹر جویریا یونس، ڈاکٹر اسرا نفیس، ڈاکٹر کائنات امین، ڈاکٹر طوبی سراج انصاری، ڈاکٹر شاز اسرار، ڈاکٹر محمد شاہد، ڈاکٹر شیراز شمیم، ڈاکٹر سید احمد عُذیر، ڈاکٹر کومل بتول، ڈاکٹر عمران علی، ڈاکٹر شین محمد علی، ڈاکٹر عائشہ جیلانی، ڈاکٹر محمد احمد میمن، ڈاکٹر عدنان احمد، ڈاکٹر سمیہ ظفر، ڈاکٹر شہزاد صدیق، ڈاکٹر شہیر احمد خان، ڈاکٹر جہانزیب، ڈاکٹر شاہ زیب یوسف، ڈاکٹر محمد انیق اعظم، ڈاکٹر اسد انیس، ڈاکٹر عدیل احمد خان، ڈاکٹر نورین اکرام، ڈاکٹر یاسر حسین، ڈاکٹر عمر افتخار اور ڈاکٹر کاشف اسرار کو ڈاکٹر آف فلاسفی(پی ایچ ڈی) کا درجہ دیا گیا۔ این ای ڈی سے اس برس پاس آؤٹ گریجویٹس کی تعداد 2081 اور 815 ماسٹرز جب کہ تھر انسٹی آف انجینئرنگ سائنس اینڈ ٹیکنالوجی کے شعبہ سول اور شعبہ کمپیوٹر سائنس سے 21 طلبا گریجویٹ ہوۓ۔ اس برس کانووکیشن میں قریباً ساڑھے سات ہزار سے زائد افراد نے شرکت کی۔
