ایشیا کپ 2025 میں آج شام دبئی میں پاکستان اور بھارت کا ہائی وولٹیج میچ کھیلا جائے گا، تاہم میچ شروع ہونے سے پہلے ہی بائیکاٹ کی بازگشت بھارتی ڈریسنگ روم تک جا پہنچی ہے۔
بھارتی میڈیا کے مطابق پاک بھارت میچ کے بائیکاٹ کی مہم نے سوشل میڈیا پر زور پکڑ لیا ہے، جس کے باعث بھارتی کھلاڑی ذہنی دباؤ کا شکار دکھائی دیتے ہیں۔ رپورٹس میں دعویٰ کیا گیا ہے کہ اس مہم کے اثرات کپتان سوریا کمار یادیو سمیت ٹیم کے دیگر کھلاڑیوں کے حوصلے پر پڑنے لگے ہیں۔
صورتحال پر قابو پانے کے لیے ہیڈ کوچ گوتم گمبھیر نے مداخلت کی اور سپورٹ اسٹاف کے ساتھ مل کر کھلاڑیوں سے بات چیت کی تاکہ ٹیم کو پراعتماد بنایا جا سکے۔ ذرائع کا کہنا ہے کہ ڈریسنگ روم میں تناؤ اس وقت مزید نمایاں ہوگیا جب پریس کانفرنس کے لیے کپتان یا ہیڈ کوچ کی بجائے اسسٹنٹ کوچ ریان ٹین ڈوشیٹ کو میڈیا کے سامنے بھیجنے کا فیصلہ کیا گیا۔
پریس کانفرنس میں جب ریان ٹین ڈوشیٹ سے پوچھا گیا کہ کیا کھلاڑی میچ کے دوران اپنے جذبات کو کھیل میں لے آئیں گے؟ تو انہوں نے جواب دیا، “جی ہاں، میرا خیال ہے وہ ایسا کریں گے۔” ان کے مطابق یہ معاملہ انتہائی حساس ہے اور کھلاڑی بخوبی جانتے ہیں کہ بھارتی عوام کے جذبات کیا ہیں۔
ہالینڈ سے تعلق رکھنے والے اسسٹنٹ کوچ نے مزید کہا کہ سوشل میڈیا پر بائیکاٹ مہم ہر گزرتے دن شدت اختیار کر رہی ہے اور وہ بھارتی عوام کی تشویش اور جذبات کو اچھی طرح سمجھتے ہیں۔
