ایشیا کپ 2025 میں پاکستان اور بھارت کے درمیان ہونے والے میچ پر بالی وڈ اداکار سنیل شیٹی نے اپنا ردعمل دیا ہے۔ میڈیا سے گفتگو کرتے ہوئے انہوں نے کہا کہ کھیلوں کے عالمی قوانین اور ضوابط پر عمل سب کے لیے ضروری ہے کیونکہ یہ صرف کرکٹ تک محدود نہیں بلکہ دیگر کھیلوں اور کھلاڑیوں کو بھی شامل کرتا ہے۔
سنیل شیٹی کا کہنا تھا کہ بھارتی شہری ہونے کے ناطے یہ ہر فرد کا ذاتی فیصلہ ہے کہ وہ میچ دیکھنا چاہتا ہے یا نہیں، میدان میں جانا چاہتا ہے یا نہیں۔ تاہم کھلاڑیوں کو قصوروار ٹھہرانا درست نہیں کیونکہ ان کا کام صرف کھیل کے ذریعے ملک کی نمائندگی کرنا ہے۔
انہوں نے مزید وضاحت کی کہ یہ معاملہ بی سی سی آئی کے دائرہ اختیار میں نہیں بلکہ ایک عالمی اسپورٹس باڈی کے تحت آتا ہے، اس لیے کسی پر الزام تراشی کرنا مناسب نہیں۔
