ایشیا کپ 2025 میں روایتی حریف پاکستان اور بھارت آج ایک دوسرے کے مدمقابل ہوں گے۔ اب تک ایونٹ میں دونوں ٹیمیں 16 بار آمنے سامنے آ چکی ہیں جن میں بھارت نے 10 جبکہ پاکستان نے 6 فتوحات اپنے نام کی ہیں۔
گزشتہ پانچ ٹی ٹوئنٹی مقابلوں میں بھارت تین اور پاکستان دو مرتبہ کامیاب ہوا۔ دبئی میں 4 ستمبر 2022 کو ہونے والے میچ میں پاکستان نے فتح حاصل کی تھی، تاہم ٹی ٹوئنٹی ورلڈ کپ 2024 کے دوران نیویارک میں کھیلے گئے حالیہ میچ میں بھارت نے پاکستان کو چھ رنز سے شکست دی۔
آج کے میچ کے دوران کھلاڑیوں اور شائقین کو شدید گرمی کا سامنا کرنا پڑ سکتا ہے۔ دبئی میں دن کے وقت درجہ حرارت 41 ڈگری سینٹی گریڈ جبکہ شام کے وقت 33 ڈگری سینٹی گریڈ تک رہنے کا امکان ہے۔
