بالی وڈ کے مشہور اداکار اور ’مسٹر پرفیکشنسٹ‘ کہلانے والے عامر خان نے ساتھی فنکاروں کے رویے پر شدید ناراضگی کا اظہار کیا ہے۔ ایک حالیہ انٹرویو میں انہوں نے کھلے الفاظ میں کہا کہ موجودہ دور میں کچھ اداکار اپنے ذاتی عملے کے اخراجات بھی پروڈیوسرز سے وصول کرنے لگے ہیں، جو کہ نہ صرف غیر منصفانہ بلکہ شرمناک ہے۔
عامر خان نے بتایا کہ ان کے ابتدائی دنوں میں یہ روایت نہیں تھی، لیکن آج کے اداکار کروڑوں روپے کمانے کے باوجود پروڈیوسرز پر اپنے ڈرائیور، ٹرینر، باورچی اور دیگر ذاتی عملے کے اخراجات ڈال دیتے ہیں۔ ان کا کہنا تھا کہ فلم سے متعلقہ اخراجات جیسے ملبوسات، میک اپ اور بالوں کے اخراجات پروڈیوسر کی ذمہ داری بنتے ہیں، لیکن ذاتی عملے کی تنخواہیں اداکاروں کو خود ادا کرنی چاہئیں۔
انہوں نے طنزیہ انداز میں کہا کہ “اگر پروڈیوسر میرا ذاتی عملہ سنبھال رہا ہے تو کیا کل کو وہ میرے بچوں کی اسکول فیس بھی بھرے گا؟”
عامر خان نے مزید کہا کہ اداکاروں کو عزت اور سہولت ضرور ملنی چاہیے، مگر اس کا یہ مطلب نہیں کہ پروڈیوسرز کو غیر ضروری بوجھ تلے دبایا جائے۔ ان کے مطابق یہ رجحان انڈسٹری کے لیے نقصان دہ ہے اور اس سے فلم سازوں کے ساتھ ناانصافی ہو رہی ہے۔
