ایشیا کپ 2025 میں پاک بھارت میچ سے قبل بھارتی کھلاڑیوں اور شائقین کی جانب سے غیر مناسب حرکتیں جاری ہیں، جس میں اداکارہ پریتی زنٹا بھی شامل ہو گئی ہیں اور وہ تنقید کی زد میں آ گئیں۔
رپورٹس کے مطابق، پریتی زنٹا کی فرنچائز کنگز الیون پنجاب نے ایک سوشل میڈیا پوسٹ میں اسپورٹس مین اسپرٹ کی خلاف ورزی کی اور بھارت کے خلاف میچ کے شیڈول والے پوسٹر سے پاکستان کا لوگو ہٹا دیا۔ پوسٹر میں پاکستان کے لوگو کی جگہ ایک سفید ڈبہ لگا دیا گیا، جبکہ بھارتی کرکٹ بورڈ کا لوگو واضح طور پر دکھایا گیا۔
دنیا بھر کے کرکٹ شائقین نے اس اقدام پر شدید ردعمل ظاہر کیا اور پریتی زنٹا کو تنقید کا نشانہ بنایا۔ بھارتی صارفین نے بھی اس حرکت کو احمقانہ اور اوچھی حرکت قرار دیا۔ کنگز الیون پنجاب نے بڑھتی ہوئی تنقید کے بعد اپنی پوسٹ پر کمنٹس کا سیکشن بند کر دیا۔
کرکٹ شائقین اس اقدام کو کھیل کی روح کے منافی اور کھیل کے وقار کو مجروح کرنے والا قرار دے رہے ہیں۔
واضح رہے کہ ایشیا کپ 2025 میں پاک بھارت ٹاکرا 14 ستمبر کو دبئی میں شیڈول ہے اور اگر دونوں ٹیمیں سپر فور مرحلے میں پہنچتی ہیں تو ان کا دوسرا میچ 21 ستمبر کو ہوگا۔
