کراچی کے علاقے نیو کراچی میں صبا سینما کے قریب واقع ایک گارمنٹس فیکٹری میں آتشزدگی کے بعد آگ نے شدت اختیار کر لی اور مزید دو فیکٹریوں کو بھی اپنی لپیٹ میں لے لیا۔ صورتحال کے پیش نظر پولیس نے قریبی فیکٹریوں میں کام فوری طور پر روک دیا ہے۔
فائر بریگیڈ حکام کے مطابق، جیسے ہی آگ لگنے کی اطلاع ملی، فوری طور پر ابتدائی طور پر دو فائر ٹینڈرز روانہ کیے گئے، مگر آگ کی شدت میں اضافے کے بعد مزید گاڑیاں طلب کی گئیں اور اس وقت 11 فائر ٹینڈرز آگ بجھانے میں مصروف ہیں۔ ابتدائی طور پر آگ صرف فیکٹری کی پہلی منزل تک محدود تھی لیکن کچھ ہی دیر میں پوری عمارت میں پھیل گئی۔ آتشزدگی کے دوران تین منزلہ عمارت منہدم ہوگئی اور گرتے وقت ایک زوردار دھماکہ بھی ہوا جس کے نتیجے میں متعدد افراد زخمی ہوگئے۔
ریسکیو حکام کے مطابق ملبے تلے کئی افراد پھنسے ہونے کا خدشہ ہے اور فائر فائٹرز کی کوششیں جاری ہیں تاکہ انہیں نکالا جا سکے۔ آگ کی لپیٹ میں آنے کے باعث قریبی علاقے میں خوف و ہراس پھیل گیا، اور دھوئیں کے بادل دور دور تک دیکھے گئے۔
سرکاری ذرائع کے مطابق تاحال جانی اور مالی نقصان کی حتمی تصدیق نہیں ہوئی ہے، لیکن سرچ اینڈ ریسکیو آپریشن مکمل ہونے کے بعد صورتحال واضح ہوگی۔ ایس ایس یو کمانڈوز اور دیگر ریسکیو ادارے بھی موقع پر پہنچ گئے ہیں اور امدادی کارروائیوں میں حصہ لے رہے ہیں۔ پولیس نے علاقے کو گھیرے میں لے لیا ہے اور قریبی سڑکیں بند کر دی گئی ہیں تاکہ ریسکیو آپریشن میں رکاوٹ نہ آئے۔
