مراکش فیفا فٹبال ورلڈ کپ2026میں جگہ بنانے والا پہلا افریقی ملک بن گیا ہے ۔رباط میں کھیلے گئے کوالیفائر میں مراکش نے نائجر کے خلاف پانچ ۔صفر سے شاندار فتح سمیٹ کر گروپ میں18پوائنٹس کے ساتھ سرفہرست پوزیشن کو یقینی بنایا ہے۔
اسماعیل صیباری نے دو گول کئے، ایوب الکعبی، حمزہ ایگامانے اور عزالدین اوناحی نے ایک، ایک مرتبہ فٹبال کو جال کی راہ دکھائی۔ کوالیفائرز میں مراکش کی یہ لگاتار چھٹی کامیابی ہے۔ مراکش کی ٹیم نے ساتویں مرتبہ عالمی کپ کےلئے کوالیفائی کیا۔مراکش نے2022 کے قطر ورلڈ کپ میں سیمی فائنل میں پہنچ کر سب کو حیران کر دیا تھا۔ انہوں نے کروشیا اور بیلجیئم جیسے ممالک پر مشتمل گروپ میں سرفہرست پوزیشن حاصل کی اور ناک آؤٹ مرحلے میں اسپین اور پرتگال کو شکست دی تھی، تاہم ان کا یہ شاندار سفر سیمی فائنل میں اختتام پذیر ہوا، جہاں انہیں فرانس کے ہاتھوں دو۔صفر سے ناکامی کا سامنا کرنا پڑا تھا۔ مراکش کے فٹبال شائقین نے اپنی ٹیم کے ورلڈ کپ میں جگہ بنانے پر کاسا بلانکا میں بھرپورجشن منایا۔
