بھارت کے مارکاپورم میں اپنی نوعیت کا انوکھا واقعہ پیش آیا، ایکسپریس ٹرین کو حادثاتی طور پر گرنے والے مسافر کو بچانے کے لیے تقریباً ڈیڑھ کلومیٹر تک ریورس سفر کرنا پڑ گیا۔
بھارتی میڈیا رپورٹس کے مطابق ریلوے ملازمین اور ساتھی مسافروں کی انتھک محنت کے باوجود بدقسمتی سے ٹرین سے گرنے والے شخص کو بچایا نہیں جاسکا۔
ریلوے پولیس کے مطابق گرنے والا متاثرہ شخص کملا کانتی ہری بابو (35) اپنے تین ساتھیوں کے ہمراہ گنٹور میں کونڈاویڈو ایکسپریس میں سوار ہوا تھا، یہ چاروں گنٹور ضلع کے پونور منڈل کے برہمن کوڈور کے رہنے والے تھے اور کام کے لیے کرناٹک کے یلہنکا جارہے تھے۔
رپورٹس کے مطابق ہری بابو کھانا کھانے کے بعد واش بیسن کی طرف بڑھا۔ کچھ ہی دیر بعد وہ کمپارٹمنٹ کے دروازے کے پاس کھڑا ہوگیا، اچانک ٹرین نے ہچکولے لئے تو متاثرہ ہری بابو اپنا توازن کھو بیٹھا اور چلتی ٹرین سے گر گیا۔
رپورٹس کے مطابق کچھ مسافروں نے اسے گرتے دیکھا اور فوراً ساتھیوں کو اطلاع دی۔ تاہم اس وقت تک ٹرین تقریباً ڈیڑھ کلومیٹر کا فاصلہ طے کر چکی تھی۔ انہوں نے فوری طور پر ایمرجنسی چین کھینچی اور ٹرین کو روک دیا گیا۔
معاملہ سامنے آنے پر لوکو پائلٹس نے فوری طور پر گنٹور ریلوے حکام سے رابطہ کیا۔ انہوں نے ٹرین کو ریورس کرنے کی اجازت دی۔ اس کے بعد کونڈاویڈو ایکسپریس کو احتیاط سے اس جگہ پر واپس لایا گیا جہاں متاثرہ شخص گرا تھا۔
جب ریل گاڑی مارکاپورم اسٹیشن پر پہنچی تو 108 ایمبولینس پہلے سے ہی انتظار کر رہی تھی۔ ٹرین سے گرنے والے شخص کو فوری طور پر علاج کے لیے سرکاری اسپتال لے جایا گیا۔ بروقت طبی امداد ملنے کے باوجود مذکورہ شخص جان کی بازی ہار گیا۔
