نیوز ڈیسک
August 29, 2025
اسلام آباد:وفاقی وزیر برائے خزانہ و محصولات، سینیٹر محمد اورنگزیب نے ابو ظہبی کی عالمی سرمایہ کاری و اسٹریٹجک ایڈوائزری کمپنی EIX کے گروپ چیف انویسٹمنٹ آفیسر محمد برادعی کی قیادت میں متحدہ عرب امارات کے ممتاز سرمایہ کاروں اور تاجروں کے وفد سے اہم ملاقات کی۔
وزیر خزانہ نے وفد کا خیر مقدم کرتے ہوئے پاکستان کی معیشت اور بنیادی معاشی اصلاحات کے بارے میں آگاہ کیا۔ سینیٹر اورنگزیب نے سرمایہ کاروں کے خدشات دور کرنے کے لیے حکومت کے عزم کو دوہراتے ہوئے خاص طور پر معدنیات کے شعبے میں سرمایہ کاری کے امکانات سے وفد کو آگاہ کیا جبکہ کاروباروں کے لیے توانائی اور مالیاتی لاگت کو کم کرنے کے اقدامات کو بھی اجاگر کیا۔
انہوں نے جاری نجکاری کے عمل پر روشنی ڈالی اور کہا کہ پاکستان کا مستقبل سرمایہ کاری اور برآمدات پر مبنی ترقی میں ہے اور یو اے ای کے سرمایہ کار اس سفر میں مقامی کاروباروں کے ساتھ اہم کردار ادا کر سکتے ہیں۔
یو اے ای کے وفد نے پاکستان میں پرتپاک استقبال اور مثبت بات چیت کو دونوں ممالک میں تعاون کیلئے معاون قرادیا.
