آرٹس کونسل آف پاکستان کراچی کی جانب سے ”ورلڈ کلچر فیسٹیول2025ء“ کے حوالے سے پہلی پریس کانفرنس کا انعقاد

ورلڈ کلچر فیسٹیول 2025ءکا آغا ز30اکتوبر سے ہوگا ،صدر آرٹس کونسل محمد احمد شاہ

ورلڈ کلچر فیسٹیول کا حصہ بنانے پر صدر آرٹس کونسل محمد احمد شاہ کا مشکور ہوں، اس طرح کے فیسٹیولز ہر شہر میں ہونا ضروری ہیں، نامور گلوکار راحت فتح علی خان

کراچی () آرٹس کونسل آف پاکستان کراچی کی جانب سے ”ورلڈ کلچر فیسٹیول2025ء“ کے حوالے سے پہلی پریس کانفرنس کا انعقاد حسینہ معین ہال، احمد شاہ بلڈنگ میں کیاگیا جس میں صدر آرٹس کونسل محمد احمد شاہ اور انامور گلوکار راحت فتح علی خان نے بریفنگ دی ، سیکریٹری آرٹس کونسل اعجاز فاروقی اور آرٹسٹ پروموٹر سجاد خان بھی ان کے ہمراہ تھے، اس موقع پر صدر آرٹس کونسل محمد احمد شاہ نے فیسٹیول سے متعلق پریس بریفنگ دیتے ہوئے کہاکہ ورلڈ کلچر فیسٹیول 2025ءکا اعلان چار ماہ پہلے کرنا تھا مگر پاکستان اور بھارت کی جنگ اور بارشوں کی وجہ سے نہیں کر پائے، ورلڈ کلچر فیسٹیول 2025ءکا آغا ز30اکتوبر کو ہوگا، 39روزہ فیسٹیول 7دسمبر تک جاری رہے گا، 2024ءمیں 38روزہ فیسٹیول میں 44 ممالک کے فنکاروں نے پاکستان میں پرفارم کیا، اس مرتبہ ورلڈ کلچر فیسٹیول میں 102 ممالک کے 800 سے زائد آرٹسٹ پاکستان آرہے ہیں جن میں 31افریقین، 30ایشین ،26یورپین ممالک سمیت آسٹریلیا، نیوزی لینڈ، کینیڈا، امریکہ، برازیل، ارجینٹینا، میکسیکو، کولمبو ،پرتگال ، بنگلہ دیش ، بھوٹان ، سری لنکا کے آرٹسٹ یہاں پرفارم کریں گے، 20ملکوں کے پینٹرز بھی آرہے ہیں، ہم نے اس مرتبہ میوزک، تھیٹر اور ڈانس کے ساتھ فلم کو بھی فیسٹیول میں شامل کیاہے ، احمد شاہ نے کہاکہ میں بلوچ ،سندھی سمیت پاکستان کے ہر آرٹسٹ سے محبت کرتا ہوں، فیسٹیول میں فقیر ذوالفقار ، اکبر خمیسو خان، مائی ڈھائی ، صنم ماروی بھی پرفارم کریں گی، آرٹس کونسل میں جنوری 2026سے فلم اکیڈمی شروع کررہے ہیں جس کی باقاعدہ کلاسز کا آغاز کریں گے تاکہ فلم انڈسٹری پروان چڑھے،انہوں نے مزید کہاکہ حکومت سندھ نے ہمیں سیکورٹی کے بہترین انتظامات سمیت مکمل طور پر ہر طرح سے سپورٹ کیا ہے، پاکستان کے سب سے بڑے گلوگار راحت فتح علی خان دنیا بھر میں پاکستان کا نام روشن کررہے ہیں، 7دسمبر کو اختتامی تقریب میں راحت فتح علی خان پرفارم کریں گے ، ہم 6 ستمبر کو استاد نصرت فتح علی خان صاحب کی برسی منانا چاہتے تھے مگر ربیع الاول ہے، فیسٹیول میں استاد نصرت فتح علی خان کو ٹریبیوٹ پیش کریں گے۔ نامور گلوکار راحت فتح علی خان نے کہاکہ ورلڈ کلچر فیسٹیول کا حصہ بنانے پر صدر آرٹس کونسل محمد احمد شاہ کا شکریہ ادا کرتا ہوں اس طرح کے فیسٹیولز ہر شہر میں ہونا ضروری ہیں، پاکستان کی عوام نے جشن کو جشن سمجھا اور پاکستان کی جیت کو بھرپور انداز میں منایا، میں شکر گزار ہوں آرٹس کونسل آف پاکستان کراچی اور حکومت سندھ کا جنہوں نے مجھے پرفارم کرنے کا موقع دیا،حیدرآباد ،سکھر اور کراچی میں ہونے والے تمام کانسرٹ بہت اچھے ہوئے ، سندھ حکومت نے کراچی اور لاہور میں NFAKاورRFAK اکیڈمی کھولنے کا اعلان کیا ہے جس میں ہم بچوں کو گلوکاری کے گُر سکھائیں گے اور مجھے امید ہے کہ پاکستان میں بہت ٹیلنٹ ہے۔