پاکستان کے معروف گلوکار اور اداکار علی ظفر نے بالی ووڈ فلم سَیّارہ کے مشہور گانے کا کور پیش کیا، جس پر مداحوں اور سوشل میڈیا صارفین نے ملا جلا ردعمل ظاہر کیا۔
بھارتی فلم سَیّارہ 18 جولائی کو ریلیز ہوئی تھی، اور اس رومانوی میوزیکل ڈرامہ فلم میں اہان پانڈے اور انیت پڈا نے ڈیبیو کیا۔ فلم کو بھارت کے ساتھ ساتھ دیگر ممالک میں بھی پذیرائی حاصل ہوئی اور اس کے گانے بھی کافی مقبول ہوئے۔
علی ظفر نے گانے کی ویڈیو سوشل میڈیا پر شیئر کرتے ہوئے لکھا کہ بہت کم نئے گانے مجھے متاثر کرتے ہیں، لیکن جب انہوں نے اس گانے کا اے آئی ورژن اپنے پسندیدہ گلوکار کشور کمار کی آواز میں سنا تو یہ دل کو چھو گیا، اور پھر انہوں نے خود بھی اسے گانے کا فیصلہ کیا۔
کور گانے کے شیئر ہوتے ہی مداحوں اور صارفین نے مختلف آراء کا اظہار کیا۔ کچھ لوگوں نے علی ظفر کو تنقید کا نشانہ بنایا اور کہا، “شکر ہے آپ نے گانا نہیں گایا، کاش یہاں ڈس لائیک کا بٹن ہوتا”، جبکہ دیگر نے ان کے انداز کو سراہا اور کہا، “انہوں نے گانے کو بالکل اپنے انداز میں پیش کیا ہے۔”
