ڈیلٹا ایئر لائنز کی پرواز DL 1893 ایک بڑے حادثے سے بچ گئی جب بوئنگ 737 کے بائیں پر کا ایک حصہ دورانِ پرواز ٹوٹ گیا۔
یہ پرواز اورلینڈو سے آسٹن جا رہی تھی کہ اچانک شدید جھٹکوں کے دوران طیارے کے بائیں جانب آؤٹ بورڈ فلَیپ ڈھیلا ہو گیا۔ ایک مسافر نے یہ منظر کھڑکی سے کیمرے میں محفوظ کر لیا۔
عینی شاہد نے بتایا کہ طیارہ پہلے ہی غیر معمولی ہچکولے کھا رہا تھا، اور پھر بیٹھی ایک خاتون نے کہا کہ پر ٹوٹ گیا ہے۔
خوش قسمتی سے پائلٹ نے طیارہ محفوظ طور پر آسٹن برگسٹروم انٹرنیشنل ایئرپورٹ پر اتار لیا اور تمام مسافر بالکل محفوظ رہے۔ لینڈنگ کے بعد معائنہ کیا گیا تو معلوم ہوا کہ بائیں پر کے پچھلے حصے کا فلیپ مکمل طور پر الگ ہو چکا تھا۔
ڈیلٹا ایئر لائنز کے بیان میں کہا گیا کہ پرواز آسٹن میں محفوظ طریقے سے اتاری گئی، اور لینڈنگ کے بعد بائیں پر کے فلیپ کی خرابی کا پتہ چلا۔ طیارے کو مرمت کے لیے سروس سے ہٹا دیا گیا ہے اور کمپنی کا کہنا ہے کہ مسافروں اور عملے کی حفاظت ان کی اولین ترجیح ہے۔
امریکی فیڈرل ایوی ایشن ایڈمنسٹریشن (FAA) نے واقعے کی تحقیقات شروع کر دی ہیں۔
