پاکستانی ڈرامہ انڈسٹری کے معروف اداکار عمران عباس نے حال ہی میں اداکار ببرک شاہ کی جانب سے کی گئی تنقید پر پُرسکون جواب دیا۔
ببرک شاہ نے ایک انٹرویو میں عمران عباس کو ہدفِ تنقید بناتے ہوئے کہا تھا کہ وہ فلمی ہیرو کے قابل نہیں اور کسی مرد کی طرح نظر نہیں آتے۔ اس بیان کے بعد سوشل میڈیا پر بھی کافی بحث چھڑ گئی تھی۔
اس کے جواب میں عمران عباس نے بغیر کسی جارحیت کے کہا کہ لوگوں کی نفرت یا غیر ضروری تنقید سے ان کی زندگی متاثر نہیں ہوتی کیونکہ اللّٰہ نے انہیں ان کی سوچ سے بڑھ کر کامیابیاں عطا کی ہیں۔ انہوں نے مزید کہا کہ نفرت بھی ایک پیکیج کا حصہ ہے، اور جو لوگ دوسروں سے نفرت کرتے ہیں، وہ خود کامیابیوں سے محروم رہ جاتے ہیں۔
عمران عباس نے یہ بھی کہا کہ جو لوگ سوشل میڈیا پر نفرت انگیز تبصرے کرتے ہیں، ان کی اپنی زندگی میں خاص کامیابی نہیں ہوتی اور یہی محرومیاں انہیں دوسروں پر تنقید کرنے پر مجبور کرتی ہیں۔ پیشہ ورانہ میدان میں بھی ایسے افراد دوسروں کو نیچا دکھانے کی کوشش کرتے ہیں، اور ہم ان کے لیے دعا ہی کر سکتے ہیں کہ اللہ انہیں ہدایت دے۔
