file-photo
JSMUکے طلبا کا احتجاج و دھرنا، انتظامیہ کو چار نکاتی مطالبات پیش
24 اگست ، 2025
کراچی (اسٹاف رپورٹر) جناح سندھ میڈیکل یونیورسٹی کے طلبا نے انتظامیہ کے خلاف شدید احتجاج کرتے ہوئے مرکزی دروازے پر دھرنا دیا اور اپنے مطالبات پیش کیے۔ طلبا کا کہنا تھا کہ ناقص پالیسیوں اور حالیہ بارشوں میں درپیش مشکلات نے ان کے تعلیمی سفر کو بری طرح متاثر کیا ہے۔ ہفتے کو یونیورسٹی کے مرکزی دروازے پر احتجاج کرتے ہوئے طلبا کا کہنا تھا کہ 19 اگست کو پیش آنے والے واقعے پر یونیورسٹی انتظامیہ کی باضابطہ معافی ناگزیر ہے۔ ان کے مطابق موسلا دھار بارشوں کے دوران پوائنٹس تاخیر سے چلے، طلبا کئی گھنٹے پھنسے رہے اور بعض کو رات بھر پوائنٹس میں گزارنی پڑی، مگر اس کے باوجود اگلے دن آن لائن کلاسز کا حکم جاری کیا گیا، جو سراسر ناانصافی تھی۔ طلبا نے مطالبہ کیا کہ مون سون سیزن اور دیگر حقیقی مجبوریوں کی بنیاد پر حاضری سے متعلق رعایت دی جائے، اور لازمی حاضری کے تناسب کو کم کیا جائے تاکہ تعلیمی نقصان کا ازالہ کیا جا سکے۔ ان کا کہنا تھا کہ سخت حاضری اور پاسنگ معیار سے طلبہ کا مستقبل داؤ پر لگ رہا ہے۔ مزید برآں، احتجاجی طلبا نے یونیورسٹی میں طلبہ یونین کے شفاف اور جمہوری انتخابات کا مطالبہ کیا تاکہ ہر طالب علم کو ووٹ کا حق ملے اور ان کی حقیقی نمائندگی ہو۔
=================
کراچی میں بارشوں کے بعد سمندری آلودگی میں اضافہ
تازہ ترینقومی خبریں24 اگست ، 2025
وفاقی وزیر بحری امور جنید انوار چوہدری کی ہدایت پر بندر گاہوں کی صفائی مہم شروع کر دی گئی ہے۔
جنید انوار چوہدری نے اپنے بیان میں کہا کہ صرف صفائی نہیں، آلودگی کی روک تھام ضروری ہے، بحری آلودگی کی روک تھام کے لیے میرین پولیوشن کنٹرول بورڈ فعال کر دیا۔
اُنہوں نے کہا کہ سیوریج ٹریٹمنٹ پلانٹس کے منصوبے جلد مکمل کیے جائیں گے۔
جنید انوار چوہدری کا کہنا ہے کہ موسمیاتی تبدیلی سے مون سون بارشیں غیر یقینی ہو گئی ہیں، بارش کا گندا پانی سمندر کو آلودہ کر رہا ہے۔
اُنہوں نے کہا کہ سمندری آلودگی شہریوں اور ماحولیاتی نظام کے لیے خطرہ ہے، پلاسٹک، تیل اور کیمیائی اجزاء سمندری غذا کو آلودہ کر رہے ہیں۔
جنید انوار چوہدری نے مزید کہا کہ ماہی گیر برادری کے روزگار کو شدید خطرات لاحق ہیں، ماحولیاتی تحفظ کے لیے صوبائی حکومت کے ساتھ مل کر کام کریں گے۔
========================
کراچی، چیئرمین چنیسر ٹاؤن فرحان غنی کے خلاف مقدمہ درج
تازہ ترینقومی خبریں24 اگست ، 2025
وزیر بلدیات سندھ سعید غنی کے بھائی اور کراچی کے چیئرمین چنیسر ٹاؤن فرحان غنی نے سرکاری ملازم پر تشدد کے کیس میں گرفتاری دے دی۔
سعید غنی کے بھائی فرحان غنی کے خلاف دہشت گردی دفعات کے تحت فیروز آباد تھانے میں مقدمہ درج کیا گیا ہے۔
پولیس کے مطابق فرحان غنی پر ایک ادارے کے اہلکار حافظ سہیل پر تشدد کا الزام ہے۔ مقدمے میں انسداد دہشت گردی، اقدام قتل اور دیگر دفعات شامل ہیں۔
ایف آئی آر کے متن میں مدعی کا کہنا ہے کہ 22 اگست کو وہ شارع فیصل سروس روڈ پر فائبر کیبل بچھانے کے کام کی نگرانی کر رہا تھا، اس دوران 3 گاڑیوں میں 20 سے 25 افراد آئے جن میں فرحان غنی، قمر احمد، شکیل اور دیگر شامل تھے۔
ایف آئی آر کے مطابق ملزمان نے پوچھا کس کی اجازت سے زمین کھود رہےہو؟ جس پر انہیں بتایا کہ سرکاری کام ہے، تمام اداروں کی این او سی سے کام ہورہا ہے مگر ان افراد نے تشدد کیا اور جان سے مارنے کی نیت سے اسلحہ بھی دکھایا۔
ایف آئی آر کے متن میں مدعی مقدمہ نے مزید بتایا کہ انہیں قریبی پیٹرول پمپ کے کمرے میں لےجاکر تشدد کا نشانہ بنایا گیا، پولیس موبائل کے آنے پر ملزمان نے انہیں چھوڑا۔
پولیس کے مطابق ٹاؤن چیئرمین اور پی پی پی رہنما فرحان غنی اس وقت پولیس حراست میں ہیں۔
https://www.youtube.com/watch?v=5uur1wv4yi
