پشاور میں شدید بارش اور طوفانی ہوا کے سبب ملک بھر کی پروازیں متاثر ہوئی ہیں، جن میں 4 پروازیں منسوخ اور 49 پروازیں تاخیر کا شکار ہوئیں۔
پشاور ایئرپورٹ پر موسمی حالات کے باعث لینڈنگ میں مشکلات پیش آئیں۔ فلائٹ شیڈول کے مطابق کراچی اور گوادر کے لیے پی کے 503 اور 504 پروازیں منسوخ کر دی گئیں، جبکہ کراچی سے جدہ کی پروازیں پی ایف 715 میں 6 اور پی کے 762 میں 5 گھنٹے کی تاخیر کا سامنا کر رہی ہیں۔
لاہور ایئرپورٹ پر بھی پروازیں تاخیر کا شکار ہیں، جس کی مدت 1 سے 17 گھنٹے تک رہی۔ نجی ایئر لائن کی لاہور سے ابوظہبی کی پروازیں پی اے 430 اور 431 منسوخ ہو گئی ہیں، جبکہ لاہور سے دبئی کی پروازیں پی اے 411 اور 416 میں بالترتیب 10 اور 8 گھنٹے کی تاخیر ہوئی۔ لاہور سے جدہ کی پرواز پی ایف 716 میں 4 گھنٹے کی تاخیر درج کی گئی۔
اسلام آباد سے بھی پروازیں متاثر ہیں، اسلام آباد سے ریاض کی پروازیں پی اے 274 اور 275 تاخیر کا شکار ہیں۔ اسلام آباد سے دبئی کی پروازیں پی اے 210 میں 6 اور پی اے 216 میں ساڑھے 4 گھنٹے کی تاخیر ہے۔
پشاور سے شارجہ کی قومی ایئر کی پرواز پی کے 258 میں 5 گھنٹے کی تاخیر ہوئی، جبکہ سیالکوٹ سے شارجہ اور جدہ کی تین پروازیں 3 سے 6 گھنٹے اور ملتان سے جدہ کی پروازیں پی کے 739 اور 740 میں 6 سے 8 گھنٹے تاخیر کا شکار ہیں۔
کراچی، لاہور اور اسلام آباد سے اسکردو کی پروازیں بھی متاثر ہوئی ہیں، جہاں 1 سے ساڑھے 4 گھنٹے کی تاخیر ریکارڈ کی گئی۔
