بھارت کی عدالت نے آئندہ ہفتے بالی وڈ کے معروف اداکار اکشے کمار اور ارشد وارثی کو ذاتی طور پر عدالت میں پیش ہونے کا حکم دیا ہے۔
انڈین میڈیا کے مطابق اکشے کمار اور ارشد وارثی کی کامیڈی فلم ’جولی ایل ایل بی 3‘ 19 ستمبر 2025 کو ریلیز ہونے والی ہے، جس کے سلسلے میں سول جج نے دونوں اداکاروں کو 28 اگست کو طلب کیا ہے۔
وکلاء واجد خان اور گنیش مہاسکے نے عدالت میں درخواست دائر کرتے ہوئے الزام لگایا کہ فلم میں وکلاء اور ججوں کے حوالے سے نازیبا اور طنزیہ مزاحیہ جملے شامل کیے گئے ہیں، جس کی وجہ سے فلم کی ریلیز پر پابندی لگائی جائے۔
درخواست میں کہا گیا کہ فلم میں ججوں کے لیے لفظ ’مامو‘ استعمال کیا گیا ہے، جس پر سخت اعتراض کیا گیا کیونکہ اس طرح کے الفاظ عدلیہ کے وقار کی توہین کے مترادف ہیں۔
وکلا نے مزید کہا کہ فلم کے ٹیزر کی تشہیر ڈیجیٹل میڈیا پر کی گئی ہے، جس میں اکشے کمار اور ارشد وارثی نے وکلاء کے بینڈ پہن کر پروموشن کیا، اور اس سے قانونی پیشے کی شبیہ کو نقصان پہنچا ہے۔
درخواست گزاروں نے عدالت سے درخواست کی کہ فلم کے پروڈیوسرز اور اداکار 28 اگست کو جج جے جی پوار کے سامنے پیش ہوں۔
