کیپٹل ڈویلپمنٹ اتھارٹی (سی ڈی اے) کے چیئرمین محمد علی رندھاوا نے واضح کیا ہے کہ اسلام آباد میں اس وقت نئے اسٹیڈیم کی تعمیر کا کوئی منصوبہ نہیں ہے۔
انہوں نے کہا کہ شہر میں کرکٹ اور فٹبال کے 25-25 گراؤنڈز بنانے کا منصوبہ ہے اور کرکٹ اسٹیڈیم کی تعمیر کے حوالے سے پاکستان کرکٹ بورڈ (پی سی بی) کے ساتھ ملاقات بھی ہو چکی ہے۔
چیئرمین کا کہنا تھا کہ اسلام آباد میں اسٹیڈیم کہاں بنایا جائے گا، اس کا فیصلہ ماہرین کی رائے اور جائزہ کے بعد کیا جائے گا اور اسی بنیاد پر لوکیشن کا انتخاب کیا جائے گا۔
انہوں نے مزید کہا کہ شہر کے موجودہ کرکٹ گراؤنڈز کی حالت بہتر بنانے کی ضرورت ہے اور پچز کو انٹرنیشنل معیار کے مطابق اپ گریڈ کیا جائے گا۔ اس حوالے سے ایف نائن پارک میں گراؤنڈ کی بہتری کے لیے سابق کرکٹر راشد لطیف کی مدد لی جا رہی ہے۔
واضح رہے کہ اس سے قبل خبریں آئی تھیں کہ سی ڈی اے ایف نائن پارک میں نیا اسٹیڈیم بنائے گا، لیکن عوامی ردعمل کے بعد سی ڈی اے نے وضاحت جاری کی کہ پارک میں کوئی نیا اسٹیڈیم نہیں بنایا جائے گا۔
